കോതമംഗലം: ഒരാഴ്ച നീളുന്ന കോതമംഗലം മണ്സൂണ് ഫെസ്റ്റിവല് ‘മണ്സൂണ് മാജിക്’ ഓഗസ്റ്റ് 1ന് ആരംഭിക്കും. തട്ടേക്കാട് മിനി സ്വിറ്റ്സര്ലന്റ് ആണ് പ്രധാന വേദി. കോതമംഗലത്തിന്റെ മഴക്കാല വിനോദസഞ്ചാര സാധ്യതകള് പ്രയോജനപ്പെടുത്തി മേഖലയിലെ ടൂറിസം വികസനത്തിന് പുതിയ ദിശാ ബോധം നല്കുക എന്ന ലക്ഷ്യത്തോടെയാണ് ഫെസ്റ്റ് സംഘടിപ്പിക്കുന്നതെന്ന് ഷിബു തെക്കുംപുറം എംഎല്എ പറഞ്ഞു. ഓഗസ്റ്റ് 1 ശനിയാഴ്ച വൈകിട്ട് 4ന് ജലവിഭവ വകുപ്പ് മന്ത്രി മോന്സ് ജോസഫ് ഫെസ്റ്റ് ഉദ്ഘാടനം ചെയ്യും. ‘മഴ അനുഭവത്തിനായി കോതമംഗലത്തേക്ക് വരൂ’ എന്ന പ്രമേയത്തിലാണ് മണ്സൂണ് ഫെസ്റ്റ് സംധ . ബന്ധപ്പെട്ട വിവിധ സര്ക്കാര് വകുപ്പുകളും തദ്ദേശസ്വയംഭരണ സ്ഥാപനങ്ങളും ടൂറിസം സംരംഭകരും ടൂറിസം രംഗത്ത് പ്രവര്ത്തിക്കുന്ന വിവിധ ഏജന്സികളും സഹകരിച്ചാണ് പരിപാടി സംഘടിപ്പിക്കുന്നത്. എംഎല്എയുടെ 100 ദിന കര്മപരിപാടിയില് ഉള്ക്കൊള്ളിച്ചാണ് മണ്സൂണ് ഫെസ്റ്റ് ആസൂത്രണം ചെയ്തിരിക്കുന്നത്. ഓഗസ്റ്റ് 1 മുതല് 9 വരെ സംഘടിപ്പിക്കുന്ന ഫെസ്റ്റിവലിന്റെ ലക്ഷ്യങ്ങളും പരിപാടികളുടെ രൂപരേഖയും ഷിബു തെക്കുംപുറം എംഎല്എ വിശദീകരിച്ചു.
മഴപ്പാട്ട് സന്ധ്യ, ബൈക്ക് റൈഡ്, സൈക്ലത്തോണ്, ജീപ്പ് റൈഡ്, ഷൂട്ട് ദി റെയിന്, ട്രക്കിങ് ട്രയല്, മഴനൃത്ത മത്സരം തുടങ്ങി മഴയും പ്രകൃതിയും പ്രമേയമാക്കിയ വൈവിധ്യമാര്ന്ന പരിപാടികളാണ് ഫെസ്റ്റിവലിന്റെ ഭാഗമായി ഒരുക്കിയിരിക്കുന്നത്. ഫെസ്റ്റിവലിനോടനുബന്ധിച്ചു നാട്ടു രുചികളുടെ മേളയും ഒരുക്കും. കോതമംഗലത്തെ വിവിധ ഡെസ്റ്റിനേഷനുകളില് നിന്നുള്ള മഴ ദൃശ്യങ്ങള് റീല്സാക്കി സമ്മാനം നേടാനുള്ള അവസരവുമുണ്ട്. മണ്സൂണ് ഫെസ്റ്റിവലിന്റെ സുഗമമായ നടത്തിപ്പിനായി കുട്ടമ്പുഴ ഗ്രാമ പഞ്ചായത്ത് പ്രസിഡന്റ മേരി കുര്യാക്കോസിന്റെ നേതൃത്വത്തില് ജനപ്രതിനിധികളെയും വിവിധ വകുപ്പുകളില് നിന്നുള്ള ഉദ്യോഗസ്ഥരെയും ടൂറിസം രംഗത്ത് പ്രവര്ത്തിക്കുന്നവരെയും ഉള്പ്പെടുത്തി വിപുലമായ സംഘാടക സമിതി രൂപീകരിച്ചിട്ടുണ്ട്.
