കോതമംഗലം: മഴക്കുറവിനെ തുടര്‍ന്ന് പെരിയാറില്‍ ജലനിരപ്പ് താഴ്ന്നതോടെ ഭൂതത്താന്‍കെട്ട് ഡാമിന്റെ 15 ഷട്ടറുകളില്‍ 12 എണ്ണവും അടച്ചു. മുന്‍കാലങ്ങളില്‍ എല്ലാ വര്‍ഷവും ഈ കാലയളവില്‍ ഡാമിന്റെ 15 ഷട്ടറുകളും തുറന്നിടുന്നതാണ്. എന്നാല്‍ ഈ വര്‍ഷം കാലവര്‍ഷം ദുര്‍ബലമായതിനാല്‍ ഇന്നലെ രാവിലെ മൂന്ന് ഷട്ടറുകള്‍ മാത്രമാണ് തുറന്നിട്ടിരുന്നത്. പെരിയാറിലേക്കുള്ള നീരൊഴുക്കും ഇടമലയാര്‍ പവര്‍ ഹൗസില്‍ വൈദ്യുതി ഉത്പാദനം കുറവായതിനാല്‍ അവിടെ നിന്ന് പെരിയാറിലേക്ക് എത്തുന്ന വെളളത്തിന്റെ അളവും കുറവാണ്. മഴക്കാലത്ത് നിറയാറുള്ള കല്ലാര്‍കുട്ടി, ലോവര്‍പെരിയാര്‍ ഡാമുകളില്‍ നിന്നുള്ള അധികജലവും താഴേക്ക് എത്തുന്നില്ല. കീരമ്പാറയിലേതുള്‍പ്പെടെയുള്ള പെരിയാറില്‍ നിന്നുള്ള കുടിവെള്ള പദ്ധതികളെ പ്രതിസന്ധിയിലാക്കുമെന്നതും ഭൂതത്താന്‍കെട്ടിന്റെ ഷട്ടറുകള്‍ അടച്ചിടാന്‍ മറ്റൊരു കാരണമാണ്.
കോതമംഗലം: കീരംപാറ പഞ്ചായത്തിലെ പുന്നേക്കാട് മേഖലയില്‍ കടന്ന രണ്ട് കാട്ടാനകളെ പെരിയാര്‍ കടത്തി. കീരംപാറ പഞ്ചായത്ത് പ്രസിഡന്റ് റീന ജോഷിയുടെ നേതൃത്വത്തില്‍ കഴിഞ്ഞ ദിവസം ചേര്‍ന്ന സര്‍വകക്ഷി യോഗത്തിലെ തീരുമാനത്തിന്റെ അടിസ്ഥാനത്തിലാണ് പുന്നേക്കാട് മേഖലയിലെത്തിയ കാട്ടാനകളെ തുരത്തി പെരിയാര്‍ കടത്തി വിടുന്നതിനുള്ള നടപടികള്‍ക്ക് ഇന്നലെ തുടക്കമായത്.
പുന്നേക്കാട് വനപാലകര്‍ കാട്ടാനകളെ തുരത്തുന്നത് വീക്ഷിക്കാന്‍ ഷിബു തെക്കും പുറം എംഎല്‍എയും എത്തിയിരുന്നു. ജനങ്ങളുടെ ആശങ്ക പരിഹരിക്കുന്നതിനും കാട്ടാന ശല്യത്തിന് ശാശ്വത പരിഹാരം കാണുന്നതിനും അടിയന്തര നടപടികള്‍ സ്വീകരിക്കുമെന്ന് എംഎല്‍എ പറഞ്ഞു.
എല്ലാ രാഷ്ട്രീയകക്ഷികളുടെയും ജനപ്രതിനിധികളുടെയും പിന്തുണയോടെയാണ് നടപടി പുരോഗമിക്കുന്നത്. പ്രശ്‌ന പരിഹാരത്തിനായി വിവിധ രാഷ്ട്രീയകക്ഷികളും ജനപ്രതിനിധികളും പഞ്ചായത്ത് ഭരണസമിതിയും ഉദ്യോഗസ്ഥരും നാട്ടുകാരും ഒരുമിച്ച് മുന്നോട്ടുവന്നത് അഭിനന്ദനാര്‍ഹമാണെന്നും എംഎല്‍എ പറഞ്ഞു.പുന്നേക്കാട് കാട്ടാനകള്‍ ജനവാസ മേഖലയിലേക്ക് കടന്നുവരുന്നത് തടയുന്നതിനായി ഫെന്‍സിംഗ് നിര്‍മാണം ഏതാനും ആഴ്ചകള്‍ക്കകം പൂര്‍ത്തിയാക്കുന്ന രീതിയില്‍ നടപടികള്‍ പുരോഗമിക്കുകയാണെന്നും രാത്രികാലങ്ങളില്‍ പെരിയാറില്‍ ബോട്ടില്‍ പട്രോളിംഗ് നടത്തുന്നതിനുള്ള നടപടികളും സ്വീകരിക്കുമെന്ന് എംഎല്‍എ കൂട്ടിച്ചേര്‍ത്തു.
റാപ്പിഡ് റെസ്‌പോണ്‍സ് ടീം അംഗങ്ങളെ മേഖലയില്‍ സ്ഥിരമായി നിയോഗിക്കുന്നതിനുള്ള നടപടികളും സ്വീകരിക്കും. തുടര്‍ നടപടികള്‍ സംബന്ധിച്ച് തീരുമാനമെടുക്കുന്നതിനായി ഓഗസ്റ്റ് മൂന്നിന് വൈകിട്ട് മൂന്നിന് എംഎല്‍എയും, പഞ്ചായത്ത് ഭരണ സമിതി അംഗങ്ങളും, ജനപ്രതിനിധികളും, ഡിഫ്ഒ അടക്കമുള്ള ഫോറസ്റ്റ് ഉദ്യോഗസ്ഥരുമടക്കം കീരംപാറ പഞ്ചായത്തില്‍ സംയുക്തയോഗം ചേരും. കാട്ടാന ശല്യത്തിന് ശാശ്വത പരിഹാരം കാണുന്നതിനുള്ള തുടര്‍ പ്രവര്‍ത്തനങ്ങള്‍ യോഗത്തില്‍ ചര്‍ച്ച ചെയ്യും.
മേഖലയിലെ പ്രധാന റോഡുകളില്‍ വെളിച്ചം ഉറപ്പാക്കുന്നതിനുള്ള നടപടികളും വേഗത്തിലാക്കും. പുന്നേക്കാട്തട്ടേക്കാട് റോഡില്‍ വൈദ്യുതിവിളക്കുകള്‍ സ്ഥാപിക്കുന്ന പദ്ധതി സംസ്ഥാന സര്‍ക്കാരിന്റെ നൂറുദിന കര്‍മപരിപാടിയില്‍ ഉള്‍പ്പെടുത്തി നടപ്പാക്കുന്നതിനുള്ള നടപടികളും സ്വീകരിക്കുന്നതിനൊപ്പം ഇതര റോഡുകളിലും സോളാര്‍ ലൈറ്റുകള്‍ സ്ഥാപിക്കുന്നതിനും നടപടിയുണ്ടാകും. കാട്ടാന ശല്യം രൂക്ഷമായ മേഖലകളില്‍ ജനങ്ങളുടെ സുരക്ഷ ഉറപ്പാക്കുന്നതിനൊപ്പം വന്യജീവികളും ജനങ്ങളും തമ്മിലുള്ള സംഘര്‍ഷം കുറയക്കുന്നതിനുള്ള ദീര്‍ഘകാല പദ്ധതികള്‍ക്കും പ്രാധാന്യം നല്‍കുമെന്ന് എംഎല്‍എ പറഞ്ഞു. ഫെന്‍സിംഗ്, രാത്രികാല പട്രോളിംഗ്, ആര്‍ആര്‍ടി സംവിധാനം, റോഡുകളില്‍ വെളിച്ചം എന്നിവ ഉള്‍പ്പെടെയുള്ള നടപടികള്‍ സമയബന്ധിതമായി പൂര്‍ത്തിയാക്കി കീരംപാറ പഞ്ചായത്തിലെ കാട്ടാന ശല്യത്തിന് ശക്തമായ പരിഹാരം കാണുകയാണ് ലക്ഷ്യമെന്നും എംഎല്‍എ വ്യക്തമാക്കി.
