മൂവാറ്റുപുഴ: ആദിവാസി വിഭാഗത്തില്പെട്ട പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച് ഗര്ഭിണിയാക്കിയ കേസിലെ പ്രതിക്ക് 83 വര്ഷം കഠിനതടവും ഒരുലക്ഷത്തിപതിനായിരം രൂപ പിഴയും ശിക്ഷ വിധിച്ച് മൂവാറ്റുപുഴ കോടതി. പൂയംകൂട്ടി തലവച്ചപാറ ആദിവാസി ഉന്നതിയിലെ ഷാജി (35 കുഞ്ഞാണ്ടി) യെയാണ് മൂവാറ്റുപുഴ പോക്സോ സ്പെഷ്യല് കോടതി ജഡ്ജി ജി മഹേഷ് ശിക്ഷിച്ചത്. പിഴ തുകയില് നിന്ന് ഒരുലക്ഷം രൂപ അതിജീവിതയ്ക്ക് നല്കണം.
വിവിധ വകുപ്പ് പ്രകാരം വിധിച്ച ശിക്ഷ പ്രകാരമുള്ള തടവ് ഒരുമിച്ച് അനുഭവിച്ചാല് മതി. ഹോസ്റ്റലില് താമസിച്ച് പഠിച്ചിരുന്ന പെണ്കുട്ടി 2019ല് വേനല് അവധിക്കാലത്തും സെപ്റ്റംബറില് ഓണം അവധിക്കാലത്തും വീട്ടില് എത്തിയപ്പോള് പല തവണ ഷാജിയുടെ പീഡനത്തിനിരയായി. പെണ്കുട്ടിയില് മാറ്റങ്ങള് കണ്ടുതുടങ്ങിയതോടെ സംശയം തോന്നിയ ഹോസ്റ്റല് വാര്ഡന് 2020 ഫെബ്രുവരി 20ന് പെണ്കുട്ടിയെ ഗവ. ആശുപത്രിയില് എത്തിച്ച് പരിശോധിപ്പിച്ചപ്പോഴാണ് അഞ്ച് മാസം ഗര്ഭിണിയാണെന്ന് സ്ഥിരീകരിച്ചത്.
തുടര്ന്ന്, ഹോസ്റ്റല് അധികൃതര് കുട്ടമ്പുഴ പോലീസില് പരാതി നല്കി. പെണ്കുട്ടിയുടെ മൊഴിയിലാണ് ഷാജിയെ അറസ്റ്റ് ചെയ്തത്. ഇന്സ്പെക്ടര്മാരായ ടി.എ യൂനസ്, ബി അനില്, സബ് ഇന്സ്പെക്ടര് വി.കെ ശശി കുമാര് സീനിയര് സിവില് പോലീസ് ഓഫീസര് വി.എം സൈനബ എന്നിവരുടെ നേതൃത്വത്തിലാണ് അന്വേഷണം നടത്തി കുറ്റപത്രം സമര്പിച്ചത്. പ്രൊസിക്യൂഷനു വേണ്ടി സ്പെഷ്യല് പബ്ലിക് പ്രൊസിക്യൂട്ടര് പി.ആര് ജമുന ഹാജരായി.
