കോതമംഗലം: മാർ അത്തനേഷ്യസ് കോളേജിലെ എൻ സി സി കേഡറ്റുകളും, എൻ സി സി പൂർവ്വ വിദ്യാർത്ഥികളും ചേർന്ന് ഗാന്ധി ജയന്തി ദിനത്തിൽ ഇടമലയാർ ട്രൈബൽ സ്കൂളിൽ ശുചീകരണ പ്രവർത്തനങ്ങൾ നടത്തി. നവംബർ ഒന്നിന് സ്കൂൾ തുറക്കുന്നതിന് മുന്നോടിയായാണ് സ്കൂൾ കെട്ടിടവും പരിസരവും വൃത്തിയാക്കിയത്. 2020 ൽ എം. എ കോളേജിലെ എൻ സി സി കേഡറ്റുകളും പൂർവ്വ വിദ്യാർത്ഥികളും ചേർന്ന് വർഷങ്ങളായി അധികൃതരിൽ അവഗണിക്കപ്പെട്ടുകിടന്ന സ്കൂൾ കെട്ടിടം പെയിന്റ് ചെയ്ത് പുനരുദ്ധരിക്കുകയുണ്ടായി. പിന്നീട് കോവിഡ് നിയന്ത്രണങ്ങളെ തുടർന്ന് പഠനം നടന്നിരുന്നില്ല. ഈ സാഹചര്യത്തിലാണ് എം. എ. കോളേജിലെ എൻ സി. സി കേഡറ്റുകൾ തുടർ ശുചീകരണ പ്രവൃത്തികൾ ഏറ്റെടുത്തു നടത്തിയത്.
കുട്ടമ്പുഴ ഗ്രാമ പഞ്ചായത്ത് വൈസ് പ്രസിഡന്റ് ബിൻസി മോഹനൻ ഉദ്ഘാടനം നിർവഹിച്ചു. പഞ്ചായത്ത് മെമ്പർ ജോഷി പി പി, മുൻ എൻ സി സി ഓഫീസറായ ക്യാപ്റ്റൻ ഐസക് കുര്യൻ, ക്യാപ്റ്റൻ ഡോ.എബി പി വര്ഗീസ്, ഫാ. വര്ഗീസ്, അനീഷ് തങ്കപ്പൻ, അജിത് കെ യൂ, ഇടമലയാർ സ്കൂൾ പ്രധാന അധ്യാപകൻ ഒ. പി ജോയ് എന്നിവർ നേതൃത്വം നൽകി. പഠന പഠ്യേതര വിഷയങ്ങളിൽ ഇവിടത്തെ കുട്ടികൾക്ക് തുടർന്നും കോളേജിൽ നിന്ന് എല്ലാ സഹായങ്ങളും നൽകുമെന്ന് പ്രിൻസിപ്പൽ ഡോ. ഷാന്റി എ അവിരാ പറഞ്ഞു.
