കോതമംഗലം : കുട്ടമ്പുഴ പഞ്ചായത്തിലെ ജനവാസ മേഖലയായ ഒന്നാംപാറയിൽ ഇന്ന് വെളുപ്പിനെ ഇറങ്ങിയ കാട്ടാനക്കൂട്ടം വ്യാപകമായി കൃഷി നശിപ്പിച്ചു. ഉരുളൻതണ്ണിക്ക് സമീപം ഒന്നാംപാറയിലാണ് ഒരു കൂട്ടം ആനകൾ എത്തി ഭീകരാന്തരീക്ഷം സൃഷ്ടിച്ചത്. പ്രദേശവാസിയായ ജോൺസൺ മേമടത്തിലിൻ്റെ ഒന്നരയേക്കറോളം വരുന്ന കൃഷിയിടം കാട്ടാനക്കൂട്ടം തിന്നും ചവിട്ടിയും നശിപ്പിക്കുകയായിരുന്നു. ഇന്നലെ അർദ്ധരാത്രി എത്തിയ ആനകൾ ഇന്ന് വെളുപ്പിനെയാണ് കാട്ടിലേക്ക് മടങ്ങിയത്.
പ്രദേശവാസികൾ ഒച്ചവച്ച് ആനക്കൂട്ടത്തെ ഓടിക്കാൻ ശ്രമിച്ചെങ്കിലും നടന്നില്ല. കൃഷിയിടത്തിലെ റബർ, തെങ്ങ്, കൂവ, കുരുമുളക്, കയ്യാലക്കെട്ടുകൾ എന്നിവ കാട്ടാനകൾ നശിപ്പിച്ചു. തകർന്നു കിടക്കുന്ന ഫെൻസിംഗ് പുനസ്ഥാപിക്കാനും, നഷ്ടപരിഹാരം ലഭ്യമാക്കാനും, നൈറ്റ് പട്രോളിം ഏർപ്പെടുത്താനും വനംവകുപ്പ് നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
