കോതമംഗലം : കോതമംഗലം മണ്ഡലത്തിലെ സമ്പൂർണ ഡിജിറ്റൽ ഹൈടെക് പ്രീ – സ്കൂൾ പദ്ധതി സംസ്ഥാനത്തിന് മാതൃകയാണെന്ന് പൊതു വിദ്യാഭ്യാസ വകുപ്പു മന്ത്രി പ്രൊഫ. സി രവീന്ദ്രനാഥ് പറഞ്ഞു. ആൻ്റണി ജോൺ എം എൽ എ യുടെ ഡിജിറ്റൽ ഹൈടെക് പ്രീ – സ്കൂൾ പദ്ധതി പ്രഖ്യാപനം കോതമംഗലം ടൗൺ യു പി സ്കൂളിൽ ഓൺ ലൈനായി നിർവ്വഹിച്ചു സംസാരിക്കുകയായിരുന്നു മന്ത്രി.ഇതോടെ ശാസ്ത്രീയവും ഗുണമേന്മയുള്ളതുമായ ആധുനിക പ്രീ – സ്കൂൾ വിദ്യാഭ്യാസം എല്ലാവർക്കും സാധ്യമാകുമെന്നും അദ്ദേഹം പറഞ്ഞു.
മണ്ഡലത്തിൽ നടപ്പാക്കിയ കൈറ്റ് സമഗ്ര വിദ്യാഭ്യാസ പദ്ധതിയിലൂടെ മണ്ഡലത്തിലെ സർക്കാർ,എയ്ഡഡ് വിദ്യാലയങ്ങളോടനുബന്ധിച്ചുള്ള മുഴുവൻ പ്രീ – സ്കൂളുകൾക്കും പ്രൊജക്റ്റർ,ലാപ്ടോപ്പ്,സ്പീക്കർ, മൗണ്ടിങ്ങ് കിറ്റ് ഉൾപ്പെടെയുള്ള ഐ സി ടി ഉപകരണങ്ങൾ ചടങ്ങിൽ വിതരണം ചെയ്തു. ഇതോടനുബന്ധിച്ച് മണ്ഡലത്തിലെ എസ് എസ് എൽ സി, പ്ലസ് ടു,വി എച്ച് എസ് ഇ,എൽ എസ് എസ്,യു എസ് എസ്,എൻ എം എം എസ് പരീക്ഷകളിൽ മികവു തെളിയിച്ച വിദ്യാലയങ്ങൾക്കുള്ള എം എൽ എ അവാർഡ് വിതരണവും നടന്നു.
ആന്റണി ജോൺ എം എൽ എ അദ്ധ്യക്ഷത വഹിച്ചു.നഗരസഭ ചെയർ പേഴ്സൺ മഞ്ജു സിജു മുഖ്യാതിഥിയായി.ചടങ്ങിൽ നഗരസഭ കൗൺസിലർമാരയ ജാൻസി മാത്യു,കെ എ നൗഷാദ്,പ്രിൻസി എൽദോസ്,കെ വി തോമസ്,ഡി ഇ ഒ കെ ലത,എഇഒ പി എൻ അനിത,ബിപിസി പി ജ്യോതിഷ്, കൈറ്റ് കോർഡിനേറ്റർ എസ് എം അലിയാർ,ബെന്നി ആർട്ട് ലൈൻ, സിസ്റ്റർ ട്രീസ ജോസ്,സിസ്റ്റർ ടിസാ റാണി, ഫാദർ ജയ്സൺ ജോർജ്,എ ഇ ഷെമീദ, ലിപി പീറ്റർ എന്നിവർ പ്രസംഗിച്ചു.
