കോതമംഗലം: മഴയെ ആഘോഷമാക്കി കോതമംഗലത്ത് സംഘടിപ്പിച്ച മൺസൂൺ മാജിക് ഫെസ്റ്റിന് ഞായറാഴ്ച സമാപനം. മഴയുടെ താളവും പ്രകൃതിയുടെ സൗന്ദര്യവും സാഹസികതയും ഒത്തുചേർന്ന ഫെസ്റ്റിവലിന്റെ ഭാഗമായി ഇന്നലെ നടന്ന മഴനൃത്ത മത്സരം ശ്രദ്ധേയമായി.
മഴയുടെ താളത്തിനൊത്ത് ചുവടുവെച്ച മത്സരാർത്ഥികളുടെ മികച്ച പ്രകടനങ്ങൾ കാണികൾക്ക് വേറിട്ട അനുഭവമായി. ആവേശകരമായ മത്സരത്തിൽ മയൂര കുട്ടമ്പുഴ ഒന്നാം സ്ഥാനവും മയൂര കോതമംഗലം രണ്ടാം സ്ഥാനവും കെസിവൈഎം കോതമംഗലം മൂന്നാം സ്ഥാനവും നേടി. വിജയികൾക്കുള്ള സമ്മാനങ്ങൾ ഷിബു തെക്കുംപുറം എംഎൽഎ വിതരണം ചെയ്തു.
ഫെസ്റ്റിവലിന്റെ സമാപന ദിവസമായ ഞായറാഴ്ച രാവിലെ 9ന് കോതമംഗലത്ത് നിന്ന് ബൈക്ക് റൈഡ് നടത്തും.കസ്റ്റംസ് ഡെപ്യൂട്ടി കമ്മീഷണർ റോയ് വർഗീസ് ബൈക്ക് റൈഡ് ഫ്ലാഗ് ഓഫ് ചെയ്യും. തട്ടേക്കാട് മിനി സ്വിറ്റ്സർലൻ്റിൽ റൈഡ് സമാപിക്കും.
തുടർന്ന് വൈകിട്ട് 4ന് തട്ടേക്കാട് മിനി സ്വിറ്റ്സർലൻ്റിൽ നടക്കുന്ന സമാപന സമ്മേളനം മന്ത്രി അനൂപ് ജേക്കബ് ഉദ്ഘാടനം ചെയ്യും. ഡീൻ കുര്യാക്കോസ് എംപി മുഖ്യാതിഥിയാകും.
