കോതമംഗലം: നിയമസഭാ തെരഞ്ഞെടുപ്പില്‍ ഉജ്ജ്വല വിജയം നേടിയതിന് പിന്നാലെ നിയുക്ത എംഎല്‍എ ഷിബു തെക്കുംപുറം ജനങ്ങള്‍ നല്‍കിയ വന്‍ പിന്തുണയ്ക്ക് നന്ദി അറിയിക്കുന്നതിനായി നടത്തുന്ന മണ്ഡല പര്യടനം തുടരുന്നു. സത്യപ്രതിജ്ഞയ്ക്ക് പിന്നാലെ ജനങ്ങളുമായി നേരിട്ട് കൂടിക്കാഴ്ച നടത്തി അവരുടെ പ്രശ്‌നങ്ങളും ആവശ്യങ്ങളും മനസ്സിലാക്കുകയാണ് പ്രധാന ലക്ഷ്യമെന്ന് ഷിബു തെക്കുംപുറം പറഞ്ഞു. നീണ്ടപാറയില്‍ നിന്നും ആരംഭിച്ച പര്യടനത്തിന്റെ ഉദ്ഘാടനം കവളങ്ങാട് ബ്ലോക്ക് പ്രസിഡന്റ് ബാബു ഏലിയാസ് നിര്‍വഹിച്ചു. തുടര്‍ന്ന് നേര്യമംഗലം, കവളങ്ങാട്, വാരപ്പെട്ടി മണ്ഡലങ്ങളില്‍ പര്യടനം നടന്നു.
പര്യടനത്തിനിടെ സംസാരിച്ച നിയുക്ത എം.എല്‍.എ, അടുത്ത അഞ്ച് വര്‍ഷം കോതമംഗലത്തിന്റെ സമഗ്ര വികസനത്തിനായി പ്രവര്‍ത്തിക്കുമെന്ന് അറിയിച്ചു. അടിസ്ഥാന സൗകര്യങ്ങള്‍ മെച്ചപ്പെടുത്തല്‍, റോഡ് നവീകരണം, കുടിവെള്ള പദ്ധതികളുടെ വിപുലീകരണം, ആരോഗ്യ-വിദ്യാഭ്യാസ മേഖലകളുടെ ശക്തിപ്പെടുത്തല്‍ എന്നിവക്കാണ് മുന്‍ഗണനകള്‍. യുവാക്കള്‍ക്ക് തൊഴില്‍ അവസരങ്ങള്‍ സൃഷ്ടിക്കുന്നതിനും കാര്‍ഷിക മേഖലയെ കൂടുതല്‍ പ്രോത്സാഹിപ്പിക്കുന്നതിനും പ്രത്യേക പദ്ധതികള്‍ നടപ്പിലാക്കുമെന്നും അദ്ദേഹം കൂട്ടിച്ചേര്‍ത്തു. ”ജനങ്ങള്‍ നല്‍കിയ വിശ്വാസം പ്രവര്‍ത്തനത്തിലൂടെ തെളിയിക്കും. എല്ലാ വിഭാഗങ്ങളെയും കൂട്ടിയിണക്കി മുന്നോട്ട് പോകുന്ന വികസനമാണ് ലക്ഷ്യം,” എന്ന് അദ്ദേഹം പറഞ്ഞു.
യുഡിഎഫ് നേതാക്കളായ ഷമീര്‍ പനക്കല്‍, എ ടി പൗലോസ്, ബാബു പോള്‍, പി കെ ചന്ദ്രശേഖരന്‍ നായര്‍, പി എസ് നജീബ്, നിസ്സാര്‍ ഈറക്കല്‍, സി കെ സത്യന്‍, മണ്ഡലം പ്രസിഡന്റ്മാരായ ജെയ്‌മോന്‍ ജോസ്, ജോബി ജേക്കബ്, പഞ്ചായത്ത് പ്രസിഡന്റ്മാരായ ബിന്ദു ജോര്‍ജ്ജ്, സംഗീത പ്രതീഷ്, ജില്ലാ പഞ്ചായത്ത് മെമ്പര്‍മാരായ ജോമി തെക്കേക്കര, സൗമ്യ ശശി, ബ്ലോക്ക് പഞ്ചായത്ത് മെമ്പര്‍മാരായ പി എം സിദ്ധിഖ്, രാജേഷ് കുഞ്ഞുമോന്‍, പ്രിയങ്ക ടോമി, മേഘ ഷിബു, പഞ്ചായത്ത് മെമ്പര്‍മാര്‍ അടക്കം നിരവധി പ്രവര്‍ത്തകര്‍ പങ്കെടുത്തു.
