കോതമംഗലം: കോതമംഗലത്തിന്റെ ജനവിശ്വാസം ഏറ്റുവാങ്ങി യുഡിഎഫ് നേതാവും ജില്ലാ കൺവീനറുമായ ഷിബു തെക്കുംപുറം ഇന്ന് നിയമസഭയിൽ എം.എൽ.എയായി സത്യപ്രതിജ്ഞ ചെയ്തു. തിരുവനന്തപുരം നിയമസഭാ സമുച്ചയത്തിൽ നടന്ന ചടങ്ങിൽ പ്രോടേം സ്പീക്കർ ജി. സുധാകരൻ മുൻപാകെയായിരുന്നു സത്യപ്രതിജ്ഞ.
പത്ത് വർഷത്തോളമായി യുഡിഎഫിന് നഷ്ടമായിരുന്ന കോതമംഗലം മണ്ഡലം ശക്തമായ ജനപിന്തുണയോടെ തിരിച്ചുപിടിച്ച ശേഷമാണ് ഷിബു തെക്കുംപുറം നിയമസഭയിലേക്കെത്തുന്നത്. കഴിഞ്ഞ തിരഞ്ഞെടുപ്പിൽ വളരെ കുറഞ്ഞ വോട്ടുകൾക്കായിരുന്നു അദ്ദേഹത്തിന്റെ പരാജയം. എന്നാൽ ഇത്തവണ മണ്ഡലത്തിലെ ജനങ്ങൾ വലിയ ഭൂരിപക്ഷം നൽകി അദ്ദേഹത്തെ വിജയിപ്പിച്ചത് രാഷ്ട്രീയ രംഗത്ത് ശ്രദ്ധേയമായ മുന്നേറ്റമായാണ് വിലയിരുത്തപ്പെടുന്നത്.
ജനങ്ങളോടൊപ്പമുള്ള സജീവ പ്രവർത്തനവും മണ്ഡലത്തിലെ സ്ഥിരമായ ഇടപെടലുകളും ഷിബു തെക്കുംപുറത്തിന് വലിയ ജനപിന്തുണ നേടിക്കൊടുത്തുവെന്നാണ് യുഡിഎഫ് നേതാക്കൾ പറയുന്നത്. വികസന വിഷയങ്ങളിൽ ശക്തമായ ഇടപെടൽ നടത്തുമെന്നും കോതമംഗലത്തിന്റെ ആവശ്യങ്ങൾ നിയമസഭയിൽ ഉന്നയിക്കുമെന്നും അദ്ദേഹം പ്രതികരിച്ചു.
