കോതമംഗലം: കൊച്ചി-ധനുഷ്ക്കോടി ദേശീയ പാതയില് നേര്യമംഗലം ആര്ച്ച് പാലത്തിന് സമീപം ട്രാവലര് ജീപ്പിന് പിന്നില് ഇടിച്ച് മറിഞ്ഞ് മലപ്പുറം, തൃപ്പൂണിത്തുറ സ്വദേശികളായ 7 വിനോദസഞ്ചാരികള്ക്ക് പരിക്ക്.
പരിക്കേറ്റ മലപ്പുറം വളാഞ്ചേരി മൂത്തോടത്തുമന എം. ഉണ്ണികൃഷ്ണന് (56), ഭാര്യ സൂര്യവ്യന്ദ (49), മലപ്പുറം എടരിക്കോട് ചൂരക്കാട്ടുമന രഘുനാരായണന് (40), ഭാര്യ എസ്. ഗോപിക (33), തൃപ്പൂണിത്തുറ തളിയില്മന ദേവിക ശ്രീദേവി (25), ചിറ്റൂര് സൂര്യകാലടിമന സൂരജ് (38), പട്ടിമറ്റം നെന്മേനിമന ദാമോദരന്നമ്പൂതിരി (65) എന്നിവരെ കോലഞ്ചേരി മെഡിക്കല് കോളേജ് ആശുപത്രിയില് പ്രവേശിപ്പിച്ചു.
നേര്യമംഗലം പാലത്തിന് അക്കരെ ഇഞ്ചത്തൊട്ടി കവലക്ക് സമീപം ഞായറാഴ്ച പുലര്ച്ചെ 5.30നാണ് അപകടം. ആവോലിച്ചാലിലെ റിസോര്ട്ടില്നിന്ന്് മാമലകണ്ടം സന്ദര്ശിക്കാനായി രണ്ട് ജീപ്പുകളിലായി പോകുകയായിരുന്നു ബന്ധുക്കളായ 14 അംഗസംഘം. ഇതില് ഒരു ജീപ്പാണ് അപകടത്തില്പ്പെട്ടത്. മുന്നില് പോകുകയായിരുന്ന ട്രാവലറിനെ ജീപ്പ് മറികടക്കുന്നതിനിടെ എതിര്ദിശയില്നിന്നെത്തിയ സ്കൂട്ടറില് ഇടിക്കാതിരിക്കാന് ട്രാവലര് വെട്ടിക്കുന്നതിനിടെ ജീപ്പിന് പിന്നില് ഇടിച്ച് ജീപ്പ് മറിഞ്ഞാണ് അപകടം.
റോഡ് അരുകിലേക്കാണ് ജീപ്പ് മറിഞ്ഞത്. കൂടെ ഉണ്ടായിരുന്നവരും ജീപ്പ് ഡ്രൈവര്മാരും ട്രാവലറില് ഉണ്ടായിരുന്നവരും ചേര്ന്ന് പരിക്കേറ്റവരെ ഉടന് നേര്യമംഗലത്തെ സ്വകാര്യ ആശുപത്രിയില് എത്തിച്ച് പ്രഥമ ശുശ്രൂഷ നല്കി.
ഇവരെ പിന്നീട് രണ്ട് ആംബുലന്സുകളിലായി കോലഞ്ചേരി ആശുപത്രിയില് എത്തിക്കുകയായിരുന്നു. മുഖത്തിന് സാരമായി പരിക്കേറ്റ സൂര്യവൃന്ദ ഒഴിച്ച് ബാക്കിയുള്ളവര് ഇന്ന് വൈകിട്ടോടെ ആശുപത്രി വിട്ടു.
