കോതമംഗലം: വടാട്ടുപാറക്കാരുടെ യാത്രാ ദൈർഘ്യം കുറക്കാൻ പഞ്ചായത്ത് ആസ്ഥാനമായ കുട്ടമ്പുഴയുമായി ബന്ധപ്പിക്കുന്ന ബംഗ്ലാവ് കടവ് പാലം നിർമ്മിക്കണം. കുട്ടമ്പുഴ പഞ്ചായത്തിലെ വടാട്ടുപാറ ഗ്രാമക്കാർ ഇപ്പോൾ പഞ്ചായത്ത് ആസ്ഥാനത്ത് എത്തുന്നത് കീരംപാറ പഞ്ചായത്തിലൂടെ 36 കിലോമീറ്റർ ചുറ്റി സഞ്ചരിച്ചാണ്. പാലം യാഥാർത്ഥ്യമായാൽ ഇവർക്ക് പബായത്ത് ആസ്ഥാനത്തേക്കുള്ള ദൂരം മൂന്നര കിലോമീറ്ററായി കുറയും. മലയോര ഗ്രാമമായ വടാട്ടുപാറയിലെ പതിനായിരക്കണക്കിന് ജനങ്ങളുടെ ആറ് പതിറ്റാണ്ടുകളായുള്ള ആവശ്യമാണ് വടാട്ടുപാറയെ കുട്ടമ്പുഴയുമായി ബന്ധിപ്പിക്കുന്ന ബംഗ്ലാവ് കടവ് പാലം.
വടാട്ടുപാറയിലെ ജനങ്ങള്ക്ക് പഞ്ചായത്ത്, വില്ലേജ്, ആശുപത്രി, ആയൂര്വേദ ആശുപത്രി, പ്ലസ് ടു സ്കൂള് അടക്കം നിരവധി സ്ഥാപനത്തില് എത്തിച്ചേരണമെങ്കില് നിലവിൽ കീരംപാറ വഴി 36 കിലോമീറ്റര് ചുറ്റി സഞ്ചരിക്കണം. ഇതിനായി വലിയ യാത്രാചിലവും വഹിക്കണം. എന്നാല് വടാട്ടുപാറ പലവന്പടിയില് നിന്നും മൂന്നര കിലോമീറ്റര് ദൂരം മാത്രമേയുള്ളൂ ബംഗ്ലാവ് കടവില് പാലം പണിതാല് കുട്ടമ്പുഴയിലെത്താന്.
ഭൂതത്താന്കെട്ട്, വടാട്ടുപാറപാറകുത്ത്, ഇടമലയാര്, താളുകണ്ടം, വൈശാലിഗുഹയടക്കം പ്രദേശത്തെ പ്രധാന കാഴ്ച വിസ്മയങ്ങൾ കോർത്തിണക്കി ടൂറിസത്തിൻ്റെ അനന്തമായ സാധ്യത ഉപയോഗപ്പെടുത്തുന്നതിനും വന്യമൃഗശല്യം ഒരു പരിധിവരെ കുറയ്ക്കുന്നതിനും ഈ പാലത്തിന്റെ നിര്മ്മാണം ഉപകരിക്കും. പലവന്പടി-കുട്ടമ്പുഴ ബംഗ്ലാവ് കടവ് വരെ പ്രൈവറ്റ് ബസ് സര്വ്വീസ് നടത്തിയിരുന്നു. മുൻപ് കടവില് യാത്രാ സൗകര്യത്തിനായി ചങ്ങാടവുമുണ്ടായിരുന്നു.
കാലങ്ങളായി അതും നിലച്ച് കിടക്കുകയാണ്.കടവ് വരെ യാത്രായോഗ്യമായ റോഡും ഉണ്ടായിരുന്നു. ഇതുമായി ബന്ധപ്പെട്ട് മുൻപ് പല സംഘടനകളും നിരവധി നിവേദനങ്ങളും സമരങ്ങളും സംഘടിപ്പിച്ചിട്ടുണ്ട്. ഫോറസ്റ്റ് ഡിപ്പാര്ട്ട്മെന്റിന്റെ അനാവശ്യമായ ഇടപെടല് മൂലമാണ് പദ്ധതി നടപ്പാക്കുന്നതിന് പലപ്പോഴും തടസ്സമാകുന്നത്. അതിനാല് വനം, റവന്യൂ, പൊതുമരാമത്തു വകുപ്പുകളെ ത്രിതലപഞ്ചായത്തുകളും എംഎല്എ, എംപി. എന്നിവരും ചേർന്ന് ഏകോപിപ്പിച്ച് സർക്കാർ ഈ പാലം നിര്മ്മിക്കുന്നതിന് അടിയന്തിരനടപടികള് സ്വീകരിക്കണം. അതിന് അനുകൂല സാഹചര്യങ്ങൾ നിലനിൽക്കുന്നുമുണ്ട്.
പദ്ധതി പ്രദേശം ഉൾപ്പെടുന്ന ത്രിതല പഞ്ചായത്തുകളും, നിയമസഭ പാർലമെൻ്റ് മണ്ഡലങ്ങളും സംസ്ഥാന ഭരണവും ഒരേ മുന്നണിതന്നെയാണ്. കഴിഞ്ഞ എൽഡിഎഫ് സർക്കാരിൻ്റെ കാലത്ത് ബംഗ്ലാവ് കടവ് പാലത്തിന് പലവട്ടം ബജറ്റിൽ ടോക്കൺ വകകൊള്ളിച്ചിട്ടുള്ളതാണ്. എന്നാൽ ഒരിക്കൽ പോലും പദ്ധതിയുടെ നടത്തിപ്പിനായി യാതൊരു നടപടികളും മുന്നോട്ടു പോയിട്ടില്ല.ഷിബു തെക്കുംപുറം എംഎൽഎ അടുത്ത ഒന്ന് (ഓഗസ്റ്റ്) മുതൽ നടപ്പാക്കുന്ന 100 ദിന കർമ്മ പരിപാടികളിൽ ബ്ലാവന, മണികണ്ടൻചാൽ പാലങ്ങളുടെ ഡിപിആർ തയ്യാറാക്കി സർക്കാർരിന് സമർപ്പിക്കുമെന്ന് പ്രഖ്യാപിച്ചിട്ടുണ്ട്.
ആക്കൂട്ടത്തിൽ ബംഗ്ലാവ് കടവ് പാലത്തിൻ്റെയും ഡിപിആർ തയ്യാറാക്കി സമർപ്പിച്ച് നിർമ്മാണാനുമതി നേടി പാലം നിർമ്മാണ നടപടികൾ ആരംഭിച്ച് വടാട്ടുപാറക്കാരുടെ യാത്രാ ദുരിതത്തിന് അറുതി വരുത്തണമെന്ന് പൊതു പ്രവർത്തകരായ ബ്ലോക്ക് പഞ്ചായത്ത് മുന് സ്ഥിരം സമിതി ചെയര്മാന് ജെയിംസ് കോറമ്പേല്, കുട്ടമ്പുഴ പഞ്ചായത്ത് മുന് പ്രസിഡന്റുമാരായ ജോയി കുര്യാക്കോസ്, കെ.എം. അബ്ദുള്ളാക്കുഞ്ഞ്, പഞ്ചായത്ത് മുന് മെമ്പര് പി.ഐ. പൈലി എന്നിവര് ആവശ്യപ്പെട്ടു.
