കുട്ടമ്പുഴ: ഉരുളൻതണ്ണിയിൽ കാറ്റ് കശക്കി എറിഞ്ഞത് ആറു കുടുംബങ്ങളുടെ കിടപ്പാടം. വൈകിട്ട് ഉണ്ടായ കാറ്റിൽ മണലിൽ പാറുക്കുട്ടി, ചക്കുംപൊട്ടയിൽ സി.എ.ഷിജു,സഹോദരൻ ഷിബു എന്നിവരുടെ വീടുകളുടെ മേൽകൂര പൂർണമായും പറന്നു പോയി. കുട്ടികളുടെ പാഠ പുസ്തകങ്ങളും വസ്ത്രങ്ങളും നനഞ്ഞു നശിച്ചു. ചോലട്ട് കുഞ്ഞുമോൻ,പേണാട്ട് സംഗീത്,വിശാലാക്ഷി എന്നിവരുടെ വീടുകൾക്കു മേൽ മരങ്ങൾ വീണ് തകർന്നു.
തകർന്ന വീടുകൾ യുഡിഎഫ് ജില്ലാ കൺവീനർ ഷിബു തെക്കുംപുറം, പഞ്ചായത്ത് പ്രസിഡൻ്റ് കാന്തി വെള്ളക്ക യ്യൻ, പഞ്ചായത്ത് അംഗങ്ങളായ കെ.എ.സിബി, ജോഷി പൊട്ടയ്ക്കൽ,മേരി പയ്യാല എന്നിവർ സന്ദർശിച്ചു. വാസയോഗ്യമല്ലാത്ത വീടുകളിൽ കഴിയുന്നവരെ സുരക്ഷിത കേന്ദ്രത്തിലേക്ക് മാറ്റി. വീടുകൾ അറ്റകുറ്റപണി നടത്തി വാസയോഗ്യമാക്കാൻ നടപടി വേണമെന്ന് ഷിബു തെക്കുംപുറം ആവശ്യപ്പെട്ടു.
