കോതമംഗലം: കോട്ടപ്പടി, പിണ്ടിമന പഞ്ചായത്തുകളിലെ ജനവാസകേന്ദ്രങ്ങളില് ദിവസങ്ങളായി കാണപ്പെട്ട പിടിയാനയെ സ്പെഷ്യല് ഡ്രൈവിലൂടെ പെരിയാര് കടത്തിവിട്ടു. പഴയ ഭൂതത്താന്കെട്ടിലൂടെ പുഴനീന്തി ആന ഭൂതത്താന്കെട്ട് ഡാമിന് താഴെയെത്തി. ആദ്യമായിട്ടാണ് കാട്ടാന ഡാമിന് താഴെ എത്തിയത്. രണ്ടുദിവസമായി ആനയെ പെരിയാര് കടത്തിവിടുന്നതിന് കോടനാട് ആര്ആര്ടിയും മേയ്ക്കപ്പാല ഫോറസ്റ്റ് സ്റ്റേഷന് വനപാലകരും ചേര്ന്ന് നടത്തിയ ശ്രമം മൂന്നാം ദിവസമാണ് ഫലം കണ്ടത്. ബുധനാഴ്ച രാത്രി തുടങ്ങിയ ഡ്രൈവിലൂടെയാണ് വ്യാഴാഴ്ച രാവിലെ 6.15 ഓടെ വേട്ടാംപാറ ഭാഗത്തുകൂടി പെരിയാറിലെ പഴയ ഭൂതത്താന്കെട്ട് ഭാഗത്തേക്ക് ഓടിച്ചുവിട്ടത്.
പുഴയില് ഇറങ്ങിയ ആന ഡാമിന് സമീപത്തേക്ക് നടന്നെത്തുകയായിരുന്നു. ആന എത്തിയത് കാണാന് നിരവധി പേര് പാലത്തില് തടിച്ചുകൂടിയിരുന്നു. വനപാലകര് എത്തി ഒച്ചവെച്ച് ആനയെ 8.30 ഓടെ വീണ്ടും പഴയ ഭൂതത്താന്കെട്ട് ഭാഗത്തേക്ക് ഓടിച്ച് കരിമ്പാനി വനത്തിലേക്ക് ഓടിച്ചുകയറ്റി. ആന തിരിച്ചെത്തിയാല് തുരത്തുന്നതിന് ഈ ഭാഗത്ത് പ്രത്യേക സംഘത്തെ നിരീക്ഷണത്തിനും ഏര്പ്പെടുത്തി.
