കോതമംഗലം: പോലീസിനെ വെല്ലുവിളിച്ച് ഒളിവില് കഴിയുകയായിരുന്ന ക്രിമിനല് കേസ് പ്രതി അര്ജുന് ആയങ്കി അറസ്റ്റില്. കണ്ണൂരിലെ വനിതാ അഭിഭാഷകയുടെ ഫ്ലാറ്റില് നിന്നുമാണ് അര്ജുന് ആയങ്കിയെ പിടികൂടിയത്. അര്ജുന് ആയങ്കി അഭിഭാഷകയുടെ ഫ്ലാറ്റിലേക്കെത്തിയ ഓട്ടോയുടെ ഡ്രൈവര് ആണ് നിര്ണായക വിവരം നല്കിയത്. അര്ജുനെ ഓടിച്ചിട്ട് പിടികൂടുകയായിരുന്നെന്നും അറസ്റ്റ് ചെയ്യാനായത് പോലീസിന്റെ കൂട്ടായ പരിശ്രമം കൊണ്ടെന്നും കണ്ണൂര് പോലീസ് കമ്മീഷണര് വിജയ് ഭാരത് റെഡ്ഡി പറഞ്ഞു.
കസ്റ്റഡിയിലും പരിഹാസം തുടര്ന്ന് അര്ജുന് ആയങ്കി. കടലില് കാണാതായവരെ കിട്ടിയോ എന്ന് ചോദ്യം. കഴിഞ്ഞ മൂന്ന് ദിവസമായി അര്ജുന് ആയങ്കിയ്ക്കായി പോലീസ് സംസ്ഥാന വ്യാപക പരിശോധന നടത്തുകയായിരുന്നു. അര്ജുനുമായി ബന്ധമുള്ളവരെ കസ്റ്റഡിയിലെടുത്ത് ചോദ്യം ചെയ്തെങ്കിലും പോലീസിന് വിവരം ലഭിച്ചിരുന്നില്ല. പിന്നാലെ കണ്ണൂരും കോഴിക്കോടും കേന്ദ്രീകരിച്ച് പോലീസ് വിശദമായ പരിശോധന നടത്തിവരികയായിരുന്നു. തുടര്ന്ന് കണ്ണൂരില് നിന്ന് അര്ജുന് ആയങ്കി സഞ്ചരിച്ച കാര് പോലീസ് കണ്ടെത്തിയിരുന്നു. നാല് കേസുകളാണ് അര്ജുനെതിരെ എടുത്തിട്ടുള്ളത്.
ആദ്യം കോതമംഗലം എസ്എച്ച്ഒ, പിന്നിട് ഊന്നുകല് എസ്എച്ഒ ഒടുവില് ആഭ്യന്തര മന്ത്രി- ഒളിവിലിരുന്ന് അര്ജുന് ആയങ്കി വെല്ലുവിളിച്ചവരുടെ പട്ടിക ഇങ്ങനെ നീളുന്നു. കോതമംഗലം എസ്എച്ഒയെ ആക്രമിക്കുമെന്ന് ഭീഷണിപെടുത്തിയ കേസില് അര്ജുന് ആയാങ്കിയുടെ ജാമ്യപേക്ഷ ഹൈകോടതി തള്ളിയിരുന്നു. ഇതിന് പിന്നാലെ പോലീസ് അര്ജുനെ പിടികൂടാന് നീക്കം ആരംഭിച്ചു. ഇതിനിടയിലാണ് കേസ് അന്വേഷിക്കുന്ന
ഊന്നുകല് എസ്എച്ഒ യെ അര്ജുന് അയങ്കി ഭീഷണിപ്പെടുത്തിയത്. പിടിക്കാമെങ്കില് പിടിച്ചോളൂ, കോതമംഗലം എസ്എച്ഒ യെ ആക്രമിക്കുമെന്നല്ലാമാണ് ഭീഷണി ഉയര്ത്തിയത്.
വധശ്രമം, ഗുണ്ടാ ആക്രമണങ്ങള്, സ്വര്ണക്കവര്ച്ച, ലഹരിക്കടത്ത്, ഡ്യൂട്ടിയിലുള്ള ഉദ്യോഗസ്ഥരെ ഭീഷണിപ്പെടുത്തല്, ഗതാഗത നിയമലംഘനങ്ങള് തുടങ്ങി നിരവധി കേസുകളാണ് കണ്ണൂരിലും മറ്റ്ജി ജില്ലകളിലുമായി ഇയാള്ക്കെതിരെയുള്ളത്. ക്രിമിനല് പശ്ചാത്തലം മുന്നിര്ത്തി ഒന്പത് ജില്ലകളില് പ്രവേശിക്കുന്നത് വിലക്കിക്കൊണ്ട് പോലീസ് ഇയാള്ക്കെതിരെ കാപ്പ ഉള്പ്പെടെ ചുമത്തിയിരുന്നു.
