മൂവാറ്റുപുഴ: ഒളിവിലിരുന്നും സമൂഹമാധ്യമങ്ങളില് സജീവമായി അര്ജുന് ആയങ്കി. ഇന്സ്റ്റഗ്രാമില് വെല്ലുവിളിച്ചുകൊണ്ടുള്ള സ്റ്റോറികള് പ്രത്യക്ഷപ്പെട്ടിട്ടുണ്ട്. തന്നെ കള്ളക്കേസില് കുടുക്കി എന്നും ഇനി മുകളില് ആകാശം താഴെ ഭൂമി എന്നുമാണ് കമന്റ്. അതേ സമയം അര്ജുന്റെ ഫോണ് മാറ്റാരോ കൈകാര്യം ചെയ്യുന്നതായി സംശയിക്കുന്നുവെന്ന് പോലീസ് വ്യക്തമാക്കുന്നു. അര്ജുന് ആയെങ്കിക്കായി മൂവാറ്റുപുഴ ഡിവൈഎസ്പിയുടെ നേതൃത്വത്തില് പ്രത്യേക സംഘം അന്വേഷണം ഊര്ജിതമാക്കിയിരിക്കുകയാണ്. അര്ജുന്റെ സുഹൃത്തുക്കളെ കേന്ദ്രീകരിച്ചും അന്വേഷണം നടക്കുന്നുണ്ട്.
ആഭ്യന്തരമന്ത്രിയെയും പോലീസ് ഉദ്യോഗസ്ഥരെയും ഒളിവിലിരുന്ന് വെല്ലുവിളിച്ച അജ്ജുന് ആയങ്കിയെ പിടികൂടാന് പോലീസ് പ്രത്യേക സംഘം രൂപീകരിച്ചിട്ടുണ്ട്. സമൂഹമാധ്യമത്തിലെ ഭീഷണി പോസ്റ്റ് ഇട്ടത് കൊച്ചിയില് നിന്നാണെന്ന് പോലീസ് കണ്ടെത്തിയിട്ടുണ്ട്. പ്രതിയെ പിടികൂടാന് വ്യാപക പരിശോധന തുടങ്ങിയതോടെ മുന്കൂര് ജാമ്യത്തിനായി ആയങ്കി സുപ്രീം കോടതിയെ സമീപിക്കാനും ശ്രമം തുടങ്ങി.
ഒളിവിലിരുന്ന് പോലീസ് ഉന്നതരെയും അഭ്യന്തരമന്ത്രിയെയും വരെ വെല്ലുവിളിക്കുകയാണ് സ്വര്ണംപൊട്ടിക്കല് അടക്കം നിരവധി ക്രമിനല് കേസുകളിലെ പ്രതി. ഭീഷണി സന്ദേശം സമൂഹമാധ്യമത്തിലൂടെയും പങ്കുവെക്കുന്നു. ഉദ്യോഗസ്ഥരെ ഭീഷണിപ്പെടുത്തിയാല് ഇനി എന്ത് നടക്കുമെന്ന് കാത്തിരുന്ന് കണ്ടോ എന്ന് പറഞ്ഞ ആഭ്യന്തരമന്ത്രിയോട് അര്ദ്ധരാത്രിയിലെ പോസ്റ്റില് വിരട്ടല് വേണ്ടെന്നായിരുന്നു ആയങ്കിയുടെ ഭീഷണി. പോലീസിനെ വിരട്ടി ക്രിമിനല് ഒളിച്ചുകളി തുടരുമ്പോഴാണ് ആഭ്യന്തമന്ത്രി പ്രതിയെ ഉടന് പിടികൂടാന് കര്ശന നിര്ദ്ദേശം നല്കിയത്.
ഇന്നലെ രാത്രിമുതല് മൂന്ന് സംഘങ്ങളായി തിരിഞ്ഞ് പോലീസ് ഇയാളെ കണ്ടെത്താന് പരിശോധന തുടങ്ങി. കൊച്ചിയിലിരുന്നാണ് ഇന്സ്റ്റ പോസ്റ്റിട്ടതെന്ന് ടവര് ലൊക്കേഷന് പോലീസ് കണ്ടെത്തി. എന്നാല് ഈ സ്ഥലത്ത് അജ്ജുന് ആയങ്കിയെ കണ്ടെത്താനായില്ല. സോഷ്യല്മീഡിയ പോസ്റ്റ് പൊലീസിനെ വഴിതെറ്റിക്കാന് മറ്റൊരാളെവെച്ച് ഇടുകയാണോ എന്നും പോലീസ് സംശയിക്കുന്നു. കൂടാതെ പോലീസ് വേട്ടയാടുന്നു എന്ന് വരുത്താനുള്ള തന്ത്രപരമായ നീക്കമാണ് വളര്ന്ന പാര്ട്ടി വേറെയെന്ന പരാമര്ശം പോസ്റ്റിലിട്ടതെന്നും പോലീസ് കരുതുന്നു. പ്രതിയെ പിടികൂടാന് പോലീസ് ശ്രമിക്കുന്നതിനിടെ മുന്കൂര് ജാമ്യം തേടി സുപ്രീം കോടതിയെ സമീപിക്കാനും പ്രതി നീക്കം തുടങ്ങി.
നിലവില് കോതമംഗലം , ഊന്നുകല് സിഐമാരെ ഭീഷണിപ്പെടുത്തിയതിനാണ് കേസ്. നിയമസഭ തെരഞ്ഞെടുപ്പിന്റെ തലേ ദിവസം ഗുണ്ടാ സംഘാംഗങ്ങള് കോതമംഗലത്തെ റിസോര്ട്ടില് ഒരുമിച്ച് കൂടിയെന്ന വിവരത്തെ തുടര്ന്നാണ് കോതമംഗലം സിഐ അര്ജ്ജുന് അടുക്കമുള്ളവരെ കരുതല് തടങ്കലിലെടുത്ത്. എന്നാല് ഈ കേസ് കെട്ടിച്ചമച്ചതാണെന്നാരോപിച്ചാണ് അന്വേഷണ ഉദ്യോഗസ്ഥനെ അര്ജ്ജുന് ഭീഷണിപ്പെടുത്തിയത്. സംഭവം അന്വേഷിച്ച ഊന്നുകല് സിഐ യോടും ഇതേ വെല്ലുവിളിയായിരുന്നു. ഹൈക്കോടതി ഈ കേസില് ജാമ്യം തള്ളിയതോടെയാണ് പ്രതി ഒളിവില് പോയി ഭീഷണി തുടരുന്നത്.
