പിണ്ടിമന : കാർഷിക വികസന കർഷകക്ഷേമ വകുപ്പിന്റെ ഞങ്ങളും കൃഷിയിലേക്ക് എന്ന പദ്ധതിയിലൂടെ സവാള കൃഷി ചെയ്ത കർഷകന് മികച്ച വിളവ്. പിണ്ടിമന പഞ്ചായത്തിലെ ഒന്നാം വാർഡായ വേട്ടാംമ്പാറയിൽ ഇഞ്ചക്കുടി മൈതീൻ എന്ന കർഷകൻ ഇരുപത്തിയഞ്ച് സെന്റ് സ്വന്തം സ്ഥലത്ത് നടത്തിയ പരീക്ഷണമാണ് വിജയത്തിലെത്തിയത്. ബാക്കി വരുന്ന ഒന്നരയേക്കർ സ്ഥലത്ത് ക്യാരറ്റ്, കുക്കുമ്പർ, പയർ തുടങ്ങീ കൃഷികളും ചെയ്തു വരുന്നു. ശീതകാലകാല പച്ചക്കറികളായ കാബേജ്, വെളുത്തുള്ളി, ക്യാരറ്റ്, കോളിഫ്ളവർ തുടങ്ങിയ കൃഷി ചെയ്ത് കൃഷി വകുപ്പിന്റെ ജില്ലയിലെ മികച്ച കർഷകനായി കഴിഞ്ഞവർഷം ഈ കർഷകനെ തെരെഞ്ഞെടുത്തിരുന്നു.കൃഷിയിടത്തിൽ നടന്ന സവാളയുടെയും, ക്യാരറ്റിന്റേയും വിളവെടുപ്പ് ഉത്സവം പഞ്ചായത്ത് പ്രസിഡന്റ് ജെസ്സി സാജു ഉദ്ഘാടനം ചെയ്തു. വൈസ് പ്രസിഡന്റ് ജെയ്സൺ ദാനിയേൽ , സ്ഥിരം സമിതി അദ്ധ്യക്ഷൻമാരായ സിബി പോൾ, മേരി പീറ്റർ പഞ്ചായത്തംഗങ്ങളായ സിജി ആന്റണി, ലത ഷാജി, ലാലി ജോയി, കൃഷി ഓഫീസർ ഇ.എം.മനോജ് ,കൃഷി അസിസ്റ്റന്റുമാരായ ഇ.പി.സാജു, വി.കെ. ജിൻസ് , കർഷകനായ ഇഞ്ചക്കൂടി മൈതീൻ രാധാ മോഹനൻ , ബിനോയി മാളിയേലിൽ എന്നിവർ പങ്കെടുത്തു.

വിവിധ കൃഷികൾ ചെയ്ത മാതൃകാ പ്രവർത്തനം നടത്തുന്ന കർഷകനെ കൃഷിയിടത്തിൽ വച്ച് കൃഷിഭവനു വേണ്ടി പ്രസിഡന്റ് ജെസ്സി സാജു പൊന്നാട നൽകി ആദരിച്ചു. മനസ്സ് വച്ചാൽ എന്തും നമ്മുടെ മണ്ണിൽ വിളയിക്കാൻ കഴിയുമെന്ന സന്ദേശവുമായി പിണ്ടിമന കൃഷിഭവൻ നടത്തുന്ന പരീക്ഷണ അടിസ്ഥാനത്തിലുള്ള വിവിധ കൃഷികൾ ഇതിനോടകം തന്നെ വിജയം നേടിയിട്ടുണ്ട്.

🌀കോതമംഗലം വാർത്ത whatsappil ലഭിക്കുവാൻ താഴെ കൊടുത്തിരിക്കുന്ന ലിങ്ക് ഉപയോഗിക്കുക..👇

https://chat.whatsapp.com/DcL8RgJp47d7R9L2iom1zx

പിണ്ടിമന : കാർഷിക വികസന കർഷകക്ഷേമ വകുപ്പിന്റെ ഞങ്ങളും കൃഷിയിലേക്ക് പദ്ധതി പ്രകാരം കിസ്സാൻമിത്ര കർഷക ഗ്രൂപ്പ് പുറത്തിറക്കിയ ഔഷധ ഗുണമുള്ള രക്തശാലി അരിയുടെ വിപണനം ആരംഭിച്ചു. കൃഷിഭവൻ ഹാളിൽ വച്ച് നടന്ന വിതരണ ഉത്ഘാടനം പഞ്ചായത്ത് പ്രസിഡന്റ് ജെസ്സി സാജു കർഷകനായ സുനിൽ വർഗ്ഗീസിന് നൽകി നിർവ്വഹിച്ചു. വൈസ് പ്രസിഡന്റ് ജയ്സൺ ദാനിയേൽ അദ്ധ്യക്ഷത വഹിച്ച ചടങ്ങിൽ കൃഷി അസിസ്റ്റന്റ് ഡയറക്ടർ വി.പി സിന്ധു പദ്ധതി വിശദീകരിച്ചു. വികസന സ്റ്റാന്റിംഗ് കമ്മിറ്റി ചെയർപെഴ്സൺ സിബി പോൾ, രാധാമോഹനൻ , ബെന്നി പുതുക്കയിൽ, ജെമിനി കുര്യൻ, രഞ്ജിത്ത് തോമസ്സ് ,ആദില യൂസഫ് , ഹരിപ്രിയ ബോസ്, എന്നിവർ സംസാരിച്ചു. കിസ്സാൻ മിത്ര കൺവീനർ കെ.പി ഷിജോയുടെ അയിരൂർ പ്പാടത്തെ ഒരേക്കർ പാടത്ത് കൃഷിചെയ്ത രക്ത ശാലി ഇനം അരിയാണ് ഒരു കിലോ വീതം പാക്ക് ചെയ്ത് വിതരണത്തിന് തയ്യാറാക്കിയത്.

ഇരുമ്പു സത്തും ധാതുലവണങ്ങളും ധാരാളം അടങ്ങിയ രക്തശാലി അരി കൊളസ്ട്രോൾ കുറക്കുന്നതിനും രക്തത്തിലെ ഹീമോഗ്ലോബിന്റെ അളവ് വർദ്ധിപ്പിക്കുന്നതിനും സഹായിക്കുന്നു. ഏറെ ഔഷധ ഗുണമുള്ള രക്ത ശാലിയിൽ ക്യാൻസർ കോശങ്ങളെ തടയുന്നതിനുള്ള ഒട്ടേറെ ഘടകങ്ങൾ ഉണ്ടെന്ന് ശാസ്ത്രീയമായി തെളിയിക്കപ്പെട്ടിട്ടുള്ളതാണ്. ആദ്യഘട്ടത്തിൽ നൂറ് കിലോ അരിക്ക് പുറമെ കിസ്സാൻ മിത്ര കർഷക ഗ്രൂപ്പിന്റെ വിവിധങ്ങളായ മുല്യ വർദ്ധിത ഉല്പന്നങ്ങൾ കൃഷിഭവന് കീഴിൽ പ്രവർത്തിക്കുന്ന കാർഷിക സംഭരണ വിപണ കേന്ദ്രം വഴി വിറ്റഴിക്കുന്നു. രക്തശാലിയുടെ ഔഷധ ഗുണങ്ങളുടെ ഭാഗമായി വരും വർഷങ്ങളിൽ കൂടുതൽ കൃഷിയിറക്കി യുവതലമുറയെ കാർഷിക രംഗത്തേക്ക് ആകർഷിക്കാനാണ് പിണ്ടിമന കൃഷിഭവന്റെ ലക്ഷ്യം. കൃഷി ഓഫീസർ ഇ.എം മനോജ് സ്വാഗതവും കൃഷി അസിസ്റ്റന്റ് വി.കെ. ജിൻസ് നന്ദിയും പറഞ്ഞു.

പല്ലാരിമംഗലം ; പല്ലാരിമംഗലം ഗ്രാമപഞ്ചായത്ത് നാലാം വാർഡിലെ തൊഴിലുറപ്പ് തൊഴിലാളികളുടെ കൂട്ടായ്മ അഞ്ചാം വാർഡിലെ വാളാച്ചിറ ഭാഗത്ത് സ്ഥലത്ത് പല്ലാരിമംഗലം കൃഷിഭവന്റെ സഹായത്തോടെ നടത്തിയ പച്ചക്കറി കൃഷിയുടെ വിളവെടുപ്പ് എംഎൽഎ ആന്റണി ജോൺ ഉദ്ഘാടനം ചെയ്തു. പഞ്ചായത്ത് പ്രസിഡന്റ് ഖദീജ മുഹമ്മദ് അദ്ധ്യക്ഷത വഹിച്ചു. വൈസ് പ്രസിഡന്റ് ഒ ഇ അബ്ബാസ്, ബ്ലോക്ക് പഞ്ചായത്തംഗം നിസാമോൾ ഇസ്മയിൽ, സ്ഥിരം സമിതി അദ്ധ്യക്ഷ സഫിയ സലിം, വാർഡ് മെമ്പർമാരായ ആഷിത അൻസാരി, റിയാസ് തുരുത്തേൽ, എ എ രമണൻ, കൃഷി ഓഫീസർ ഇ എം മനോജ്, സിഡിഎസ് ചെയർപേഴ്സൺ ഷെരീഫ റഷീദ് എന്നിവർ പ്രസംഗിച്ചു. ഈറക്കൽ ബഷീർ എന്നയാളുടെ 2 ഏക്കർ സ്ഥലത്താണ് പച്ചക്കറി കൃഷി നടത്തുന്നത്.