തിരുവനന്തപുരം : തട്ടേക്കാട് പക്ഷി സങ്കേതത്തിന്റെ സംരക്ഷിത പ്രദേശങ്ങളിലെ ജനവാസ മേഖലകളെ ഒഴിവാക്കുന്നതുമായി ബന്ധപ്പെട്ട് നാളെ തിങ്കളാഴ്ച വനം വന്യജീവി വകുപ്പ് മന്ത്രിയുടെ അധ്യക്ഷതയിൽ കേരള നിയമസഭാ സമുച്ചയത്തിൽ ഉന്നത തല യോഗം ചേരുമെന്ന് ഷിബു തെക്കുംപുറം എംഎൽഎ അറിയിച്ചു .യോഗത്തിൽ ഡീൻ കുര്യാക്കോസ് എംപി , ചീഫ് വൈൽഡ് ലൈഫ് വാർഡൻ ഡോ പ്രമോദ് ജി കൃഷ്ണൻ ഐ എഫ് എസ് , കുട്ടമ്പുഴ ഗ്രാമപഞ്ചായത്ത് പ്രസിഡണ്ട് മേരി കുര്യാക്കോസ് ,
തട്ടേക്കാട് പ്രദേശത്തെ ത്രിതല പഞ്ചായത്ത് അംഗങ്ങളെ പ്രതിനിധീകരിച്ച് ജില്ലാ പഞ്ചായത്ത് അംഗം സൗമ്യ ശശി, ബ്ലോക്ക് പഞ്ചായത്ത് അംഗം ചിഞ്ചു ബിബി , ഗ്രാമപഞ്ചായത്ത് മെമ്പർമാരായ ശ്രീജിത്ത് ശിവൻ , കാന്തി വെള്ളക്കയ്യൻ തുടങ്ങിയവരും മേഖലയിൽ നിന്ന് പങ്കെടുക്കും .
മേഖലയിലെ ജനവാസ മേഖലകളെ ഒഴിവാക്കുന്നതുമായി ബന്ധപ്പെട്ട് കേന്ദ്ര വന്യജീവി ബോർഡ് ആവശ്യപ്പെട്ട പ്രകാരമുള്ള മാർഗ്ഗ നിർദ്ദേശങ്ങളും കർമ്മ പദ്ധതിയും തയ്യാറാക്കുമ്പോൾ ജനങ്ങൾക്ക് നേരിടേണ്ടിവരുന്ന ബുദ്ധിമുട്ടുകളെ കുറിച്ച് യോഗത്തിൽ താൻ സംസാരിക്കു മെന്നും എംഎൽഎ വ്യക്തമാക്കി .
തട്ടേക്കാട് പക്ഷി സങ്കേത പ്രദേശങ്ങളിലെ ജനങ്ങൾക്ക് യാതൊരുവിധ ബുദ്ധിമുട്ടുകളും ഉണ്ടാകാതെയും , സ്വൈരജീവിതത്തിന് യാതൊരു ബുദ്ധിമുട്ടുകളും ഉണ്ടാകരുത് എന്നും ഉറപ്പാക്കുന്ന തരത്തിലുള്ള ഒരു ആക്ഷൻ പ്ലാൻ തയ്യാറാക്കുന്നതിന് നിർദ്ദേശങ്ങൾ നൽകുവാൻ വേണ്ടിയുള്ള സമിതിയായി തെരഞ്ഞെടുക്കപ്പെട്ട ജനപ്രതിനിധികൾ ഉൾപ്പെട്ട ഈ സമിതി പ്രവർത്തിക്കുമെന്നും , സമിതിയുടെ ആദ്യ യോഗം ആണ് നാളെ തിരുവനന്തപുരത്ത് ചേരുന്നതെന്നും എംഎൽഎ പറഞ്ഞു. പ്രദേശങ്ങളിലെ ആളുകൾക്ക് താൻ ഉൾപ്പെടെയുള്ള സമിതി അംഗങ്ങളോട് തങ്ങളുടെ നിർദ്ദേശങ്ങൾ അറിയിക്കാവുന്നതാണ് എന്നും എംഎൽഎ കൂട്ടിച്ചേർത്തു .
