നെല്ലിക്കുഴി : ചെറുവട്ടൂർ ഗവ.മോഡൽ ഹയർ സെക്കന്ററി സ്കൂളിലെ പൂർവ്വ വിദ്യാർത്ഥികളായ രണ്ടു യുവപ്രതിഭകളെ വീടുകളിലെത്തി ആദരിച്ചു. ബേബി പണിക്കരുടെയും അമാനുള്ളാഖാന്റെയും കുടുംബങ്ങൾ ആനന്ദനിർവൃതിയിൽ. പ്രതിഭകളെ വീടുകളിൽ ചെന്ന് ആദരിയ്ക്കാനുള്ള പൊതു വിദ്യാഭ്യാസവകുപ്പിന്റെ നിർദ്ദേശാനുസരണമായിരുന്നു ആദരം. ചെറുവട്ടൂർ ഗവ.മോഡൽ ഹയർ സെക്കന്ററി സ്കൂളിലെ പൂർവ്വ വിദ്യാർത്ഥികളായ രണ്ടുയുവപ്രതിഭകളെയാണ് പൂച്ചെണ്ടു നൽകിയും പൊന്നാട അണിയിച്ചും ആദരിച്ചത്.
മലയാള സിനിമാരംഗത്ത് ഒന്നര പതിറ്റാണ്ടായി പ്രവർത്തിച്ചുകൊണ്ടിരിക്കുന്ന അസോസിയേറ്റ് ഡയറക്ടറായ ഇരമല്ലൂർ അമ്പാടിനഗർ സ്വദേശി ബേബി പണിക്കരെയാണ് വിദ്യാർത്ഥികൾ വീട്ടിലെത്തി ആദ്യം ആദരിച്ചത്. കൊച്ചിൻ പോർട്ട് ട്രസ്റ്റ് ഫുട്ബോൾ ടീം അംഗമായ ചെറുവട്ടൂർ കവല സ്വദേശിയും മുൻ യൂണിവേഴ്സിറ്റി താരവുമായ അമാനുള്ളഖാനെയാണ് രണ്ടാമതായി ആദരമർപ്പിച്ചത്. ഇരുവരും വ്യത്യസ്ത കാലയളവുകളിൽ സ്കൂൾ തലത്തിൽ കലാ-കായിക രംഗങ്ങളിൽ ശ്രദ്ധേയരായ പൂർവ്വ വിദ്യാർത്ഥികളായിരുന്നു. ബേബി പണിക്കരുടെയും അമാനുള്ള ഖാന്റെയും ഗൃഹാങ്കണങ്ങളിൽ നടന്ന ആദരിയ്ക്കൽ ചടങ്ങിൽ ഇരുവരുടേയും കുടുംബാംഗങ്ങളും പങ്കെടുത്തു.
പി.ടി.എ.പ്രസിഡണ്ട് സലാം കാവാട്ട്, പ്രിൻസിപ്പൽ പി.എം.റഷീദ, ഹെഡ്മിസ്ട്രസ്സ് കെ.മൈമൂന, എസ്.എം.ഡി.സി.ചെയർമാൻ പി.എൻ.സന്തോഷ്, സ്റ്റാഫ് സെക്രട്ടറി സി.എ.മുഹമ്മദ്, പി.ടി.എ. മെംബർമാരായ പി.എ.സുബൈർ, മനോജ് കാനാട്ട്, പ്രോഗ്രാം കോ ഓർഡിനേറ്റർ പി.ബി.ജലാലുദ്ദീൻ, കായികാധ്യാപകൻ ടി .പ്രതാപ്കുമാർ, ഹയർ സെക്കണ്ടറി അധ്യാപിക വി.പി.പ്രഭാകുമാരി, വിദ്യാർത്ഥികളായ അദ്വൈത്, നബീൽ ബാവ, മുഹമ്മദ് ആലിം,ശിൽപ്പ, പൊതുപ്രവർത്തകൻ പി.എം.ഷാഹുൽ എന്നിവർ ആദരമർപ്പിക്കലിന് നേതൃത്വം നൽകി. രണ്ടാഴ്ചമുമ്പ് ഇവിടത്തെ വിദ്യാർത്ഥികൾ ലോകപ്രശസ്ത ആത്മീയ സാഹിത്യകാരനും പ്രഭാഷകനുമായ സാധു ഇട്ടിഅവിരയെ കുറ്റിലഞ്ഞിയിലെ വീട്ടിലെത്തി ആദരിച്ചിരുന്നു.
You must be logged in to post a comment Login