നെല്ലിക്കുഴി സ്കൂളിൽ വിദ്യാർത്ഥിയെ മർദിച്ച സംഭവത്തിൽ നടപടി ആവശ്യപ്പെട്ട് DEO ഓഫീസ് ഉപരോധിച്ചു.

• എബി കുര്യാക്കോസ്

കോതമംഗലം : നെല്ലിക്കുഴി ഗവൺമെന്റ് ഹൈസ്കൂളിൽ കഴിഞ്ഞ ദിവസം യോഗ ക്ലാസിൽ വൈകി എത്തിയ വിദ്യാർത്ഥിയെ പ്രധാന അദ്ധ്യാപകൻ ക്രൂരമായി മർദിച്ച സംഭവത്തിൽ ബന്ധപ്പെട്ട അദ്ധ്യാപകനെതിരെ നടപടി സ്വീകരിക്കണമെന്നാവശ്യപ്പെട്ട് യൂത്ത് കോൺഗ്രസ്, KSU പ്രവർത്തകർ കോതമംഗലം വിദ്യാഭ്യാസ ജില്ല ഓഫീസിലെത്തി പ്രതിഷേധം രേഖപ്പെടുത്തി. വിദ്യാഭ്യാസ ഓഫീസറുടെ അഭാവത്തിൽ സൂപ്രണ്ടുമായി ചർച്ച നടത്തുകയും ചെയ്‌തു. അദ്ധ്യാപകനെതിരെ മാതൃകാപരമായ നടപടി സ്വീകരിക്കുമെന്ന് ഉറപ്പ് ലഭിച്ചതിന് ശേഷമാണ് ഉപരോധം അവസാനിച്ചത്.

ജില്ലാ കലോൽസവുമായി ബന്ധപ്പെട്ട് പെരുമ്പാവൂരിലായിരുന്ന വിദ്യാഭ്യാസ ഓഫീസറെ സൂപ്രണ്ട് ഫോണിൽ ബന്ധപ്പെടുകയും, സംഭവം ശ്രദ്ധയിൽപ്പെട്ടിട്ടുണ്ടെന്നും കുറ്റക്കാരനായ അദ്ധ്യാപകനെതിരെ അടിയന്തിര നടപടി സ്വീകരിക്കുമെന്നും ഓഫീസർ അറിയിച്ചു. അടിയന്തര നടപടി സ്വീകരിക്കാത്ത പക്ഷം ശക്തമായ പ്രതിക്ഷേധ സമരങ്ങളുമായി മുന്നോട്ട് വരുമെന്ന് യൂത്ത് കോൺഗ്രസ്, KSU പ്രവർത്തകർ അറിയിച്ചു. അനൂപ് ഇട്ടൻ, റിയാസ് തോട്ടത്തിക്കുളം, എബി കുര്യാക്കോസ്, ജയിൻ അയിനാടൻ, സുനിർ, വിജിത്ത് എന്നിവർ പങ്കെടുത്തു.