കോതമംഗലം: പുന്നേക്കാട് മുതല്‍ തട്ടേക്കാട് വരെയുള്ള ഭാഗത്ത് വഴിവിളക്കുകള്‍ സ്ഥാപിക്കുന്നതിന്റെ നിര്‍മ്മാണോദ്ഘാടനം 25ന് നടത്തുമെന്ന് ഷിബു തെക്കുംപുറം എംഎല്‍എ കോതമംഗലം താലൂക്ക് വികസന സമിതി യോഗത്തില്‍ അറിയിച്ചു.പദ്ധതിക്കായി ധനകാര്യ വകുപ്പ് തുക കൈമാറിയിട്ടുണ്ട്. വൈദ്യുതി വകുപ്പ് പ്രവൃത്തി ആരംഭിക്കുന്നതിന് മുന്‍കൂറായി പണം ആവശ്യപ്പെട്ടതാണ് പദ്ധതി വൈകാന്‍ കാരണമായത്.
സാധാരണയായി എംഎല്‍എ ഫണ്ടില്‍ നിന്നുള്ള തുക പ്രവൃത്തി പൂര്‍ത്തിയായ ശേഷമാണ് അനുവദിക്കാറുള്ളത്. എന്നാല്‍, വഴിവിളക്ക് സ്ഥാപിക്കുന്നതിന് മുന്‍കൂറായി തുക വേണമെന്ന വൈദ്യുതി വകുപ്പിന്റെ ആവശ്യം മൂലമാണ് നടപടിക്രമങ്ങളില്‍ കാലതാമസമുണ്ടായത്. ധനകാര്യ വകുപ്പിന്റെ അനുമതിയും തുകയും ലഭിച്ച സാഹചര്യത്തില്‍ പദ്ധതി വേഗത്തില്‍ പൂര്‍ത്തിയാക്കും
ടൂറിസം ബോട്ട് സര്‍വീസ് ഡിസംബര്‍ ഒന്നിന് ആരംഭിക്കും.
ഭൂതത്താന്‍കെട്ട് ഡാമില്‍നിന്ന് നേര്യമംഗലം വരെ ഡിസംബര്‍ ഒന്ന് മുതല്‍ ബോട്ട് സര്‍വീസ് ആരംഭിക്കുമെന്നും എംഎല്‍എ അറിയിച്ചു. പ്രദേശത്തെ വിനോദസഞ്ചാര സാധ്യതകള്‍ക്ക് കൂടുതല്‍ ഉണര്‍വേകുന്ന പദ്ധതിയാണിത്. ഇതിനായി ഡാമില്‍ വെള്ളം ക്രമീരിക്കുന്നതിന് നിര്‍ദേശം നല്‍കിയിട്ടുള്ളതായും വ്യക്തമാക്കി. ബോട്ടുകളുടെ
ഫിറ്റ്‌നസ് ഉള്‍പ്പെടെയുള്ള സുരക്ഷാ ക്രമീകരണങ്ങളും വേഗത്തിലാക്കും.ഭൂതത്താന്‍കെട്ട് ഉദ്യാനത്തിന്റെ നവീകരണ പ്രവര്‍ത്തനങ്ങള്‍ ഡിസംബര്‍ മാസത്തില്‍ ആരംഭിക്കുമെന്നും അറിയിച്ചു.
ദേശീപാതയിലെ ഓട, വെയ്റ്റിംഗ് ഷെഡ് നിര്‍മ്മാണം പൂര്‍ത്തിയാക്കും.
കക്കടാശ്ശേരി മുതല്‍ നേര്യമംഗലം വരെയുള്ള ദേശീയപാതയുടെ ഇരുവശങ്ങളിലുമുള്ള ഓടകളുടെ നിര്‍മാണവും സ്ലാബ് ഇടുന്ന പ്രവൃത്തികളും എത്രയും വേഗം പൂര്‍ത്തിയാക്കാന്‍ എന്‍എച്ച്എഐ അധികൃതര്‍ക്ക് നിര്‍ദേശം നല്‍കി. റോഡ് വികസനത്തിന്റെ ഭാഗമായി പൊളിച്ചുനീക്കിയ വെയ്റ്റിംഗ് ഷെഡിന് പകരം പുതിയ വെയ്റ്റിംഗ് ഷെഡ് സ്ഥാപിക്കുന്നതിനുള്ള നടപടികളും ആരംഭിക്കും.
പട്ടയ നടപടികള്‍ പുനരാരംഭിക്കും.
പട്ടയ വിതരണവുമായി ബന്ധപ്പെട്ട് സംയുക്ത പരിശോധന പുനരാരംഭിക്കുന്നതിനുള്ള സര്‍ക്കാര്‍ ഉത്തരവ് ലഭിക്കുന്ന മുറയ്ക്ക് ജോയിന്റ് വെരിഫിക്കേഷന്‍ നടപടികള്‍ വീണ്ടും തുടങ്ങും. വിവിധ വകുപ്പുകളുമായി ബന്ധപ്പെട്ട വിഷയങ്ങള്‍ ചര്‍ച്ച ചെയ്യുകയും അവയുടെ തുടര്‍നടപടികള്‍ വേഗത്തിലാക്കാന്‍ നിര്‍ദേശങ്ങള്‍ നല്‍കുകയും ചെയ്തു.
മുനിസിപ്പല്‍ ചെയര്‍പേഴ്‌സണ്‍ ഭാനുമതി രാജു, വൈസ് ചെയര്‍മാന്‍ പ്രിന്‍സ് വര്‍ക്കി, ജില്ലാ പഞ്ചായത്ത് അംഗം ജോമി തെക്കേക്കര, പഞ്ചായത്ത് പ്രസിഡന്റുമാരായ പി.കെ. മൊയ്തു, കെ.പി. ജോര്‍ജുകുട്ടി, ബിന്ദു ജോര്‍ജ്, വിവിധ രാഷ്ട്രീയ കക്ഷി പ്രതിനിധികള്‍, വിവിധ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.
