കോതമംഗലം: നിയോജകമണ്ഡലത്തിലെ കലാ-സാംസ്കാരിക പ്രവർത്തനങ്ങൾക്ക് പുതിയ വേദിയൊരുക്കുന്നതിനായി കോതമംഗലത്ത് കൾച്ചറൽ സെന്റർ സ്ഥാപിക്കുമെന്ന് ഷിബു തെക്കുംപുറം എംഎൽഎ അറിയിച്ചു. പദ്ധതിയുടെ നിർമാണ പ്രവർത്തനങ്ങൾ ഈ വർഷം തന്നെ ആരംഭിക്കുമെന്നും വ്യക്തമാക്കി. കോതമംഗലത്തെ വിവിധ കലാ-സാംസ്കാരിക സംഘടനകളുടെ പ്രതിനിധികളുമായി എംഎൽഎയുടെ അധ്യക്ഷതയിൽ ചേർന്ന യോഗത്തിലാണ് ഇതുസംബന്ധിച്ച തീരുമാനം അറിയിച്ചത്.
കല, സാഹിത്യം, വിദ്യാഭ്യാസം തുടങ്ങി വിവിധ മേഖലകളിലെ പ്രവർത്തനങ്ങൾ ശക്തിപ്പെടുത്തുന്നതിനും സാംസ്കാരിക കൂട്ടായ്മകൾക്ക് സ്ഥിരമായ വേദി ഒരുക്കുന്നതിനുമാണ് കൾച്ചറൽ സെന്റർ വിഭാവനം ചെയ്യുന്നത്. വിവിധ സംഘടനകളുടെയും കൂട്ടായ്മകളുടെയും പ്രവർത്തനങ്ങൾ ഏകോപിപ്പിക്കുന്ന കേന്ദ്രമായി ഇത് മാറും. ലൈബ്രറി, റീഡിങ് റൂം, ഓഡിറ്റോറിയം, ഓപ്പൺ എയർ തിയേറ്റർ തുടങ്ങിയ സൗകര്യങ്ങൾ ഇവിടെ ഒരുക്കും.
സാംസ്കാരിക കേന്ദ്രത്തിന്റെ ഭാഗമായി വിമുക്തഭടന്മാരുടെ സേവനങ്ങളും ത്യാഗങ്ങളും അനുസ്മരിക്കുന്നതിനുള്ള സ്മാരകങ്ങളും സ്ഥാപിക്കും. യുദ്ധസ്മാരകം (വാർ മെമ്മോറിയൽ), പ്രതിമ, രക്തസാക്ഷി മണ്ഡപം എന്നിവയും പദ്ധതിയിൽ ഉൾപ്പെടുത്തും.
കോതമംഗലത്തിന്റെ വികസന സാധ്യതകളും വിവിധ മേഖലകളിലെ അവസരങ്ങളും ചർച്ച ചെയ്യുന്നതിനായി വികസന സെമിനാർ സംഘടിപ്പിക്കാനും യോഗം തീരുമാനിച്ചു. കോതമംഗലത്തിന്റെ സാധ്യതകളും അവസരങ്ങളും എന്ന വിഷയത്തെ ആസ്പദമാക്കി വിവിധ മേഖലകളിലെ വിദഗ്ധരെയും ബന്ധപ്പെട്ടവരെയും പങ്കെടുപ്പിച്ചായിരിക്കും സെമിനാർ സംഘടിപ്പിക്കുക. ടൂറിസം മേഖലയിലെ സാധ്യതകൾ ഉൾപ്പെടെ കാർഷികം, വിദ്യാഭ്യാസം, വ്യവസായം, സാംസ്കാരികം തുടങ്ങിയ മേഖലകളിലെ വികസന സാധ്യതകളും സെമിനാറിൽ ചർച്ച ചെയ്യും.
കോതമംഗലത്ത് ടൂറിസം ഇൻഫർമേഷൻ സെന്റർ സ്ഥാപിക്കണമെന്ന ആവശ്യവും യോഗത്തിൽ ഉയർന്നു. കോതമംഗലത്തിന്റെ വിനോദസഞ്ചാര സാധ്യതകൾ പ്രയോജനപ്പെടുത്തുന്നതിനും സഞ്ചാരികൾക്ക് ആവശ്യമായ വിവരങ്ങളും മാർഗനിർദേശങ്ങളും ലഭ്യമാക്കുന്നതിനും ഇത്തരം കേന്ദ്രം സഹായകമാകുമെന്ന അഭിപ്രായവും യോഗത്തിൽ പങ്കുവെച്ചു. സംസ്ഥാനതല കലാമത്സരങ്ങൾക്ക് കോതമംഗലത്ത് വേദിയൊരുക്കണമെന്ന ആവശ്യവും പ്രതിനിധികൾ മുന്നോട്ടുവച്ചു.
കോതമംഗലത്തിന്റെ സാംസ്കാരിക പൈതൃകം സംരക്ഷിക്കുന്നതിനും പുതിയ തലമുറയ്ക്ക് കലാ-സാഹിത്യ മേഖലകളിൽ കൂടുതൽ അവസരങ്ങൾ ഒരുക്കുന്നതിനും കൾച്ചറൽ സെന്റർ സഹായകമാകുമെന്ന് എംഎൽഎ പറഞ്ഞു. സാംസ്കാരിക പ്രവർത്തനങ്ങൾക്കൊപ്പം വിവിധ മേഖലകളിലെ വികസന സാധ്യതകൾ കൂടി പ്രയോജനപ്പെടുത്തി കോതമംഗലത്തിന്റെ മുന്നേറ്റത്തിന് ആവശ്യമായ കൂട്ടായ പ്രവർത്തനങ്ങൾ ഏകോപിപ്പിക്കുകയാണ് ലക്ഷ്യമെന്നും എംഎൽഎ വ്യക്തമാക്കി.
പ്രൊഫ. ബേബി എം. വർഗീസ്, പ്രൊഫ. കെ.എം. കുര്യാക്കോസ്, ബാബു ഏലിയാസ്, ബേസിൽ എബ്രഹാം, ഡോ. ജേക്കബ് ഇട്ടൂപ്പ്, കെ.പി. കുര്യാക്കോസ്, പി.സി. സ്കറിയ, ബാബു ഇരുമല, റോയ് പീച്ചാട്ട്, സായ് പൂത്തോട്ട, ബിന്ദു വർഗീസ്, നജീബ് പുന്നക്കോട്ടയിൽ, ബിജി ഷിബു തുടങ്ങിയവർ പങ്കെടുത്തു.
