കോതമംഗലം: നാടിന്റെ വികസന ആവശ്യങ്ങള്‍ ഏകോപിപ്പിക്കുന്നതിനൊപ്പം ജനങ്ങളുടെ ആശ്രയകേന്ദ്രമായി കൂടി എംഎല്‍എ ഓഫീസ് മാറണമെന്ന് നിയമസഭാ സ്പീക്കര്‍ തിരുവഞ്ചൂര്‍ രാധാകൃഷ്ണന്‍. കോതമംഗലം എംഎല്‍എ ഷിബു തെക്കുംപുറത്തിന്റെ പുതിയ എംഎല്‍എ ഓഫീസ് മലയിന്‍കീഴ് ബൈപാസില്‍ ഉദ്ഘാടനം ചെയ്യുകയായിരുന്നു സ്പീക്കര്‍. ഏറ്റവും നൂതനമായ സംവിധാനങ്ങളോടെ കോതമംഗലത്തെ എംഎല്‍എ ഓഫീസ് സജ്ജമാക്കാന്‍ കഴിഞ്ഞത് ശ്രദ്ധേയമാണെന്നും സ്പീക്കര്‍ പറഞ്ഞു. ജനങ്ങളുടെ ആവശ്യങ്ങള്‍ നേരിട്ട് മനസ്സിലാക്കി അവയ്ക്ക് പരിഹാരം കാണാന്‍ കഴിയുന്ന ജനകീയ സംവിധാനമായി ഓഫീസ് പ്രവര്‍ത്തിക്കണം.
വികസന പ്രവര്‍ത്തനങ്ങള്‍ ഏകോപിപ്പിക്കുന്നതിനൊപ്പം സാധാരണക്കാരുടെ പ്രശ്‌നങ്ങളില്‍ ഇടപെടാനും ഓഫീസ് മുന്‍നിരയില്‍ ഉണ്ടാകണമെന്നും സ്പീക്കര്‍ പറഞ്ഞു. ഡീന്‍ കുര്യാക്കോസ് എംപി മുഖ്യപ്രഭാഷണം നടത്തി. ജനങ്ങളുമായി കൂടുതല്‍ അടുത്ത് ഇടപഴകുന്ന തരത്തില്‍ എംഎല്‍എ ഓഫീസ് പ്രവര്‍ത്തിക്കണമെന്നും മണ്ഡലത്തിന്റെ വികസന പ്രവര്‍ത്തനങ്ങള്‍ക്ക് ഓഫീസ് കൂടുതല്‍ ശക്തമായ ഏകോപനകേന്ദ്രമായി മാറണമെന്നും എംപി പറഞ്ഞു. എല്ലാ വിഭാഗം ജനങ്ങളുടെയും ആവശ്യങ്ങള്‍ക്ക് പരിഹാരം കാണുന്ന ജനകീയ ഓഫീസായി എംഎല്‍എ ഓഫീസിനെ മാറ്റുകയാണ് ലക്ഷ്യമെന്ന് അധ്യക്ഷത വഹിച്ച ഷിബു തെക്കുംപുറം എംഎല്‍എ പറഞ്ഞു.
എംഎല്‍എ ഫണ്ടിന്റെ ഫലപ്രദമായ വിനിയോഗം, ബജറ്റില്‍ പ്രഖ്യാപിച്ച പദ്ധതികളുടെ ഏകോപനം, കേന്ദ്ര-സംസ്ഥാന സര്‍ക്കാരുകളുടെ വിവിധ വികസന, ക്ഷേമ പദ്ധതികള്‍ ജനങ്ങളിലെത്തിക്കല്‍ തുടങ്ങിയ പ്രവര്‍ത്തനങ്ങള്‍ ഓഫീസിലൂടെ ഏകോപിപ്പിക്കും. ജനങ്ങള്‍ക്ക് 24 മണിക്കൂറും സേവനം ലഭ്യമാക്കുന്നതിനായി വെര്‍ച്വല്‍ ഓഫീസ് സംവിധാനവും ഒരുക്കുന്നുണ്ട്. ഇതിനായി തയ്യാറാക്കിയ എംഎല്‍എ കണക്ട് ഡിജിറ്റല്‍ പ്ലാറ്റ്ഫോമിന്റെ ഉദ്ഘാടനം അടുത്ത മാസം നടത്തും. ഓഫീസിലെത്താതെ തന്നെ വിവിധ ആവശ്യങ്ങളും പരാതികളും അറിയിക്കാനും സര്‍ക്കാര്‍ സേവനങ്ങളുമായി ബന്ധപ്പെട്ട വിവരങ്ങള്‍ ലഭ്യമാക്കാനും കഴിയുന്ന സംവിധാനമായിരിക്കും എംഎല്‍എ കണക്ട് എന്നും പറഞ്ഞു.
യുഡിഎഫ് നിയോജകമണ്ഡലം കണ്‍വീനര്‍ ബോബന്‍ ജേക്കബ്, കെപിസിസി അംഗം എ.ജി. ജോര്‍ജ്ജ്, കോണ്‍ഗ്രസ് ബ്ലോക്ക് പ്രസിഡന്റ്മാരായ ഷമീര്‍ പനക്കന്‍, ബാബു ഏലിയാസ്, കേരള കോണ്‍ഗ്രസ് നിയോജകമണ്ഡലം പ്രസിഡന്റ് എ.ടി. പൗലോസ്, മുസ്ലിം ലീഗ് നേതാക്കളായ ഇബ്രാഹിം കവല, പി.കെ. മൊയ്തു, പി.എം. സക്കറിയ, ജേക്കബ് ഗ്രൂപ്പ് നേതാക്കളായ ഇ.എം. മൈക്കിള്‍, മാത്യു ജോസഫ്, മുന്‍ കെപിസിസി എക്‌സിക്യൂട്ടീവ് അംഗം കെ.പി. ബാബു, ഡിസിസി സെക്രട്ടറിമാരായ എം.എസ്. എല്‍ദോസ്, അബു മൊയ്തീന്‍, ആര്‍എസ് പി നേതാവ് എ.സി രാജശേഖരന്‍, നഗരസഭ ചെയര്‍പേഴ്‌സണ്‍ ഭാനുമതി രാജു, ബ്ലോക്ക് പഞ്ചായത്ത് പ്രസിഡന്റ് ജെസ്സി സാജു, വിവിധ തദ്ദേശ സ്ഥാപന ജനപ്രതിനിധികള്‍ എന്നിവര്‍ പങ്കെടുത്തു.
