കോതമംഗലം: കര്ഷകദിനത്തില് കര്ഷകര്ക്കൊപ്പം ചേര്ന്ന് കോതമംഗലം മണ്ഡലം. വിവിധ പഞ്ചായത്തുകളിലും കോതമംഗലം നഗരസഭയിലും നടന്ന കര്ഷകദിനാഘോഷങ്ങള് ഷിബു തെക്കുംപുറം എംഎല്എ ഉദ്ഘാടനം ചെയ്തു. മികച്ച കര്ഷകരെ ആദരിച്ചും കര്ഷകരുമായി സംവദിച്ചുമായിരുന്നു വിവിധ കേന്ദ്രങ്ങളിലെ പരിപാടികള്.
ജില്ലാതല കര്ഷകദിനാഘോഷത്തിന്റെ ഉദ്ഘാടന ചടങ്ങില് മുഖ്യമന്ത്രി റബറിന്റെ താങ്ങുവില 300 രൂപയായി ഉയര്ത്തുമെന്ന് പ്രഖ്യാപിച്ചിരുന്നു. റബര് കര്ഷകര് ഉള്പ്പെടെയുള്ള കര്ഷക സമൂഹത്തിന് ആശ്വാസം പകരുന്നതാണ് പ്രഖ്യാപനം. കാര്ഷിക മേഖലയെ ശക്തിപ്പെടുത്തുന്നതിനും കര്ഷകര്ക്ക് ഉല്പന്നങ്ങള്ക്ക് മെച്ചപ്പെട്ട വില ഉറപ്പാക്കുന്നതിനും സര്ക്കാര് നടപടികള് സ്വീകരിച്ചുവരികയാണെന്നും ചടങ്ങുകളില് ചൂണ്ടിക്കാട്ടി.
എംഎല്എ നേരിട്ടെത്തിയ കേന്ദ്രങ്ങളിലെല്ലാം കര്ഷകദിനാഘോഷം ഉദ്ഘാടനം ചെയ്തശേഷം മികച്ച കര്ഷകരെ ആദരിച്ചു. കര്ഷകരുമായി സംവദിച്ച എംഎല്എ കാര്ഷിക മേഖലയിലെ പ്രശ്നങ്ങളും ആവശ്യങ്ങളും നേരിട്ട് കേട്ടറിഞ്ഞു. കൃഷിച്ചെലവിലെ വര്ധന, ഉല്പന്നങ്ങള്ക്ക് ന്യായവില ലഭിക്കാത്തത്, വന്യമൃഗശല്യം തുടങ്ങിയ പ്രതിസന്ധികള്ക്കിടയിലും കൃഷിയെ ചേര്ത്തുപിടിക്കുന്ന കര്ഷകരെ സംരക്ഷിക്കേണ്ടത് സമൂഹത്തിന്റെ ഉത്തരവാദിത്തമാണെന്ന് അദ്ദേഹം പറഞ്ഞു.
കോതമംഗലം നഗരസഭയില് ചെയര്പേഴ്സണ് ഭാനുമതി രാജുവും വിവിധ പഞ്ചായത്തുകളില് പഞ്ചായത്ത് പ്രസിഡന്റുമാരായ പി.കെ. മൊയ്തു, കെ.പി. ജോര്ജ്ജ്കുട്ടി, ഉമേഷ് ശിവകുമാര്, ബിന്ദു ജോര്ജ്ജ്, സംഗീത പ്രതീഷ്, സനീറ നസീര് എന്നിവരും പരിപാടികള്ക്ക് നേതൃത്വം നല്കി. ജനപ്രതിനിധികള്, കര്ഷക പ്രതിനിധികള്, കര്ഷകര്, നാട്ടുകാര് തുടങ്ങിയവര് വിവിധ ചടങ്ങുകളില് പങ്കെടുത്തു.
