കോതമംഗലം: വനാതിര്‍ത്തിയോട് ചേര്‍ന്ന് വര്‍ഷങ്ങളായി താമസിക്കുന്ന കുടുംബങ്ങള്‍ക്ക് പട്ടയം ലഭ്യമാക്കുന്നതിനുള്ള നടപടികള്‍ വേഗത്തിലാക്കുമെന്ന് ഷിബു തെക്കുംപുറം എംഎല്‍എ. റവന്യൂ-വനം വകുപ്പുകളുടെ സംയുക്ത പരിശോധനയ്ക്കായി കോതമംഗലം നിയോജക മണ്ഡലത്തില്‍ നിന്ന് 600ഓളം അപേക്ഷകളാണ് ലഭിച്ചിട്ടുള്ളത്. പട്ടയ നടപടികള്‍ക്കായി കോതമംഗലത്ത് നേരത്തെ പ്രത്യേക ഓഫീസ് ആരംഭിച്ചിരുന്നെങ്കിലും തുടര്‍നടപടികളില്‍ തീരുമാനമാകാത്ത സാഹചര്യമാണുള്ളത്. വിഷയം സര്‍ക്കാരിന്റെ ശ്രദ്ധയില്‍പ്പെടുത്തി ശക്തമായ ഇടപെടല്‍ നടത്തുമെന്ന് എംഎല്‍എ യുഡിഎഫ് യോഗത്തില്‍ പറഞ്ഞു.
കല്ലേലിമേട്, മണികണ്ഠന്‍ചാല്‍ മേഖലകളില്‍ സംയുക്ത പരിശോധന പൂര്‍ത്തിയാക്കിയ അര്‍ഹരായവര്‍ക്ക് പട്ടയം നല്‍കുന്നതിനുള്ള നടപടികള്‍ 100 ദിന കര്‍മപരിപാടിയില്‍ ഉള്‍പ്പെടുത്തി നടപ്പാക്കും. വനാതിര്‍ത്തി പങ്കിടുന്ന മറ്റു വില്ലേജുകളിലും റവന്യൂ-വനം വകുപ്പുകളുടെ സംയുക്ത പരിശോധനയും തുടര്‍ പട്ടയനടപടികളും വേഗത്തിലാക്കുന്നതിനുള്ള ഇടപെടലുകള്‍ നടത്തുമെന്നും വ്യക്തമാക്കി.
കോതമംഗലം നിയോജക മണ്ഡലത്തിലെ ഐടി പാര്‍ക്ക് പ്രഖ്യാപനം ചെറുപ്പക്കാരായ ഉദ്യോഗാര്‍ഥികള്‍ക്കും സംരംഭകര്‍ക്കും വലിയ പ്രതീക്ഷ നല്‍കുന്നതാണെന്നും യോഗം വിലയിരുത്തി. യുഡിഎഫിന്റെ സംഘടനാ പ്രവര്‍ത്തനങ്ങളും മണ്ഡലത്തിലെ വികസന പ്രവര്‍ത്തനങ്ങളും കൂടുതല്‍ ശക്തിപ്പെടുത്തുന്നതുമായി ബന്ധപ്പെട്ട വിഷയങ്ങളും യോഗം ചര്‍ച്ച ചെയ്തു.
എംഎല്‍എ ഓഫീസില്‍ ഷിബു തെക്കുംപുറം എംഎല്‍എയുടെ അധ്യക്ഷതയില്‍ ചേര്‍ന്ന യോഗത്തില്‍ നേതാക്കളായ എ.ജി. ജോര്‍ജ്, കെ.പി. ബാബു, എം.എസ്. എല്‍ദോസ്, ഷമീര്‍ പനക്കന്‍, ബാബു ഏലിയാസ്, ബോബന്‍ ജേക്കബ്, ഇബ്രാഹിം കവല, പി.കെ. മൊയ്തു തുടങ്ങിയവരും പങ്കെടുത്തു.
