കോതമംഗലം: ജനവാസ മേഖലകളില് സ്ഥിരം സാന്നിദ്ധ്യമായ കാട്ടാനയെ റേഡിയോ കോളര് ഘടിപ്പിക്കുന്ന നടപടികള് കോട്ടപ്പടി, വടക്കുംഭാഗത്ത് ആരംഭിച്ചു. വെറ്റിലപ്പാറ, കുളങ്ങാട്ടുകുഴി, മാലിപ്പാറ തുടങ്ങിയ പ്രദേശങ്ങളില് ആന പതിവായി നിലയുറപ്പിക്കുകയും, കാര്ഷിക വിളകള്ക്ക് കനത്ത നാശം വരുത്തുകയും ചെയ്തിരുന്നു. നാട്ടുകാരുടെ പ്രതിഷേധവും, ജനപ്രതിനിധികളുടെ ഇടപെടലും ശക്തമായതോടെ ആനയെ മയക്കുവെടി വച്ച് പിടികൂടാന് ഇന്നലെ വനം മന്ത്രിയുടെ അനുമതി ലഭിച്ചിരുന്നു.
തുടര്ന്ന് ഡോക്ടറും, എസിഎഫ് ജ്യോതിഷ് ഒഴാക്കലും, ആര്ഒ ലുധീഷും ഉള്പ്പെടെയുള്ളവര് ആന തമ്പടിച്ച സ്ഥലത്ത് എത്തി പരിശോധന നടത്തിയിരുന്നു. ബുധനാഴ്ച തന്നെ ആനയെ മയക്കുവെടി വച്ച് പിടികൂടണമെന്ന ആവശ്യത്തില് നാട്ടുകാരും, ജനപ്രതിനിധികളും ഉറച്ചു നിന്നതോടെ വനപാലകരുമായി വാക്കുതര്ക്കമായി. ഒടുവില് റേഡിയോ കോളര് ഘടിപ്പിച്ച് ആനയുടെ സഞ്ചാരപാതയും നീക്കങ്ങളും നിരീക്ഷിച്ച ശേഷം കുങ്കി ആനയുടെ സഹായത്തോടെ പിടികൂടി മാറ്റാമെന്ന് ഫോറസ്റ്റ് അധികൃതര് ഉറപ്പു നല്കുകയായിരുന്നു.
തുടര്ന്നാണ് വ്യാഴാഴ്ച രാവിലെയോടെ അസി ഫോറസ്റ്റ് വെറ്ററിനറി ഓഫീസര് ഡോ. ബിനോയി, റേഞ്ച് ഓഫീസര് ലുധീഷ്, ആര്ആര്ടി ഡെപ്യൂട്ടി ആര്ഒ എബിന് തുടങ്ങിയവരുടെ നേതൃത്വത്തില് നടപടികള് ആരംഭിച്ചത്.ജനങ്ങളുടെ ബുദ്ധിമുട്ട് എത്രയും വേഗം പരിഹരിക്കുമെന്ന് ഡീന് കുര്യാക്കോസ് എംപി പറഞ്ഞു. മയക്ക് വെടി വെച്ച ആനയെ പിന്തുടര്ന്ന് റേഡിയോ കോളര് ഘടിപ്പിക്കും
