കോതമംഗലം: കുട്ടമ്പുഴ പഞ്ചായത്തിലെ വെള്ളാരംകുത്തിലെ കൃഷിയിടത്തില് കാട്ടാന ചരിഞ്ഞ സംഭവത്തില് വനം വകുപ്പ് സ്ഥല ഉടമയെ അറസ്റ്റ് ചെയ്തതില് പ്രതിഷേധിച്ച് നാട്ടുകാര് ഫോറസ്റ്റ് ഓഫീസ് ഉപരോധിച്ചു. വനംവകുപ്പ് കാര്ഷിക മേഖലയോട് കാണിക്കുന്ന നീതികേടും, ഗുണ്ടായിസവും അവസാനിപ്പിക്കണമെന്നും, കര്ഷകന് ഭൂമിയില് കൃഷിചെയ്ത് ജീവിക്കുന്നതിനുള്ള സാഹചര്യം ഒരുക്കണമെന്നും ആവശ്യപ്പെട്ടാണ് സര്വ്വകക്ഷി യോഗ തീരുമാനപ്രകാരം കുട്ടമ്പുഴ റേഞ്ച് ഫോറസ്റ്റ് ഓഫീസ് ഉപരോധിച്ചത്.
കുട്ടമ്പുഴ പാലത്തിന് സമീപത്തുനിന്നാരംഭിച്ച മാര്ച്ച് ഫോറസ്റ്റ് ഓഫീസിനു മുന്നില് പോലീസ് തടഞ്ഞു. തുടര്ന്നു നടന്ന ഉപരോധസമരം കുട്ടമ്പുഴ പഞ്ചായത്ത് പ്രസിഡന്റ് മേരി കുര്യാക്കോസ് ഉദ്ഘാടനം ചെയ്തു. വന്യമ്യഗങ്ങളെ വനത്തില് സംരക്ഷിക്കുവാന് ഉത്തരവാദപ്പെട്ടവര് അത് ചെയ്യാതെ വന്യമൃഗങ്ങള് കൃഷിഭൂമിയില് ഉണ്ടാക്കുന്ന അപകടങ്ങളുടെ പേരില് കര്ഷകനെ ജയിലില് അടക്കുന്നത് അനീതിയാണെന്ന് സമരക്കാര് ചൂണ്ടിക്കാട്ടി.
വൈസ് പ്രസിഡന്റ് എല്ദോസ് ബേബി അധ്യക്ഷത വഹിച്ചു. വിവിധ രാഷ്ട്രീയ കക്ഷി പ്രതിനിധികളായ ഷിബു തെക്കുംപുറം, വി.വി ജോണി, ഡെയ്സി ജോയി, എം.കെ രാമചന്ദ്രന് , റോബിന് സാബു, കാന്തി വെള്ളക്കയ്യന്, അരുണ് ചന്ദ്രന് ,ബിന്സി മോഹനന്, ചിഞ്ചു എബ്രാഹം, സിജു മോന് ഫ്രാന്സിസ്, ജോഷി പൊട്ടക്കല്, സിബി കെ.എ തുടങ്ങിയവര് പ്രസംഗിച്ചു.
