ബൈക്കും പെട്ടി ഓട്ടോയും കൂട്ടിയിടിച്ച് കോതമംഗലത്തെ വ്യാപാരി മരിച്ചു.

കോതമംഗലം: ഹൈറേഞ്ച് ജംഗ്ഷനിലെ മരിയ മെറ്റൽസ് ഉടമ രാമല്ലൂർ പറപ്പിള്ളിൽ പരേതനായ വർഗീസിന്റെ മകൻ ജോബി(54)ബൈക്കും പെട്ടി ഓട്ടോയും കൂട്ടിയിടിച്ച് മരിച്ചു. ഞായറാഴ്ച രാത്രി 9.30ന് ബൈക്കിൽ കോതമംഗലത്ത് നിന്ന് വീട്ടിലേക്ക് വരവേ കോതമംഗലം-ചേലാട് റോഡിൽ രാമല്ലൂരിന ടുത്താണ് അപകടം. ചേലാട് ഭാഗത്തുനിന്നും എതിരെ വന്ന പെട്ടി ഓട്ടോ ഇടിച്ചു ഗുരുതര പരിക്കേറ്റ ജോബിയെ ആശുപത്രിയിലെത്തിക്കാ തെ പെട്ടി ഓട്ടോ യാത്രികർ സ്ഥലംവിട്ടു. തൽസമയം ശോഭനപ്പടിയിൽ ഫുട്ബോൾ കളി കഴിഞ്ഞു മടങ്ങിയ രണ്ട് വിദ്യാർത്ഥികളാണ് ഓട്ടോറിക്ഷയുടെ നമ്പർ സംഭവമറിഞ്ഞെത്തിയ പോലീസിന് കൈമാറിയത്.

രക്തംവാർന്ന് ഏറെനേരം റോഡിൽ കിടന്ന ജോബിയെ തുടർന്ന് അതുവഴി വന്ന ഒരു ഓട്ടോയിൽ ധർമഗിരി ആശുപത്രിയിലെത്തിച്ചു. പിന്നീട് ആലുവ രാജഗിരി ആശുപത്രിയിൽ വിദഗ്ധ ചികിത്സക്കെത്തിച്ചുവെങ്കിലും തിങ്കളാഴ്ച പുലർച്ചെ മരിച്ചു. സംസ്കാരം ചൊവ്വാഴ്ച ഉച്ചകഴിഞ്ഞ് രണ്ടിന് കോതമംഗലം സെന്റ് ജോർജ് കത്തീഡ്രലിൽ.ഭാര്യ: അങ്കമാലി ചെന്നേക്കാട്ട് ഷൈനി. മക്കൾ : വിദ്യാർഥിനികളായ അന്ന, റോസ്. മാതാവ് നെല്ലിമറ്റം ചിറമേൽ കുടുംബാംഗം അന്നമ്മ. സഹോദരങ്ങൾ: പോളി,ടോമി,ബിന്ദു.