തള്ളയാടിനെ നഷ്ടപ്പെട്ട കുഞ്ഞാടിന് പാൽ നൽകി മാതൃത്വം ഏറ്റെടുത്ത് വെച്ചൂർ പശു.

• ഫൈസല്‍ കെ എം

മൂവാറ്റുപുഴ : മീങ്കുന്നം ആറൂർ കോച്ചേരിയിൽ ചെറിയാൻ തോമസിന്റെ വീട്ടിൽ ചെന്നാൽ ഒരു അപൂർവ കൗതുക കാഴ്ച കാണാം. കുഞ്ഞാടിനെ വത്സല്യത്തോടെ മുലയൂട്ടുന്ന ഒരു വെച്ചൂർ പശുവിന്റെ കാഴ്ചയാണത്. തള്ളയാടിനെ നഷ്ടപ്പെട്ട ആട്ടിൻകുട്ടിയ്ക്ക് തുണയായി മാറിയിരിക്കുകയാണ് ഈ വെച്ചൂർ പശു. പ്രസവത്തോടെ തള്ള ആട് മരിച്ചു പോയ ആട്ടിൻ കുട്ടിയെ തന്‍റെ കുഞ്ഞിനെ പോലെ സംരക്ഷിക്കുന്ന വെച്ചൂർ പശു ഏവർക്കും കൗതകമാകുകയാണ്. ചെറിയാൻ തോമസിന്‍റെ വെച്ചൂർ ഇനത്തിൽപ്പെട്ട പശുവാണ് തള്ളയാട് ചത്തുപോയ ആട്ടിൻകുട്ടിയെ തന്‍റെ കുഞ്ഞിനെപോലെ സംരക്ഷിക്കുന്നത്. ഏഴ് ദിവസം മുന്പാണ് പ്രസവത്തോടെ തള്ളയാടും ഒരു ആട്ടിൻ കുട്ടിയും ചത്തത്.

രക്ഷപെട്ട ആട്ടിൻകുട്ടിയെ പശുവിന്‍റെ പാലും വീട്ടിലെ മറ്റ് ആടുകളുടെ പാലും കറന്നെടുത്ത് നൽകിയാണ് ചെറിയാൻ തോമസും കുടുംബവും സംരക്ഷിച്ച് പോന്നത്. ഒരാഴ്ച പിന്നിട്ടതോടെ ആട്ടിൻകുട്ടി തുള്ളിച്ചാടി കളിക്കാൻ തുടങ്ങിയതോടെയാണ് വീട്ടിൽ മൂന്ന് മാസം മുന്പ് പ്രസവിച്ച വെച്ചൂർ പശുവിന്‍റെ അകിടിൽ നിന്നും പാല് കുടിക്കാനും പശുവിന്‍റെ കളികൂട്ടുകാരനുമായി ഈ കുഞ്ഞാട് മാറിയത്. വീട്ടിൽ വേറെ ആടുകളുണ്ടെങ്കിലും ആട്ടിൻകുട്ടി പശുവുമായിട്ടാണ് ചങ്ങാത്തം.

ചിത്രം: വെച്ചൂർ പശുവിന്‍റെ പാല് കുടിക്കുന്ന ആട്ടിൻകുട്ടി.