മൂവാറ്റുപുഴ: 45 വര്ഷത്തെ ഇടവേളയ്ക്ക് ശേഷം മൂവാറ്റുപുഴയാര് വീണ്ടും ആവേശകരമായ വള്ളംകളിക്ക് വേദിയായി. മൂവാറ്റുപുഴ നഗരസഭ സംഘടിപ്പിച്ച ത്രിവേണി ഓണം ആഘോഷങ്ങളുടെ ഭാഗമായി നടന്ന വള്ളംകളി കാണാന് നദിയുടെ ഇരുകരകളിലും വന് ജനാവലിയാണ് ഒഴുകിയെത്തിയത്. ഓണാഘോഷത്തിന് ആവേശം പകര്ന്ന ജലോത്സവം നഗരത്തിന് ഉത്സവാന്തരീക്ഷം സമ്മാനിച്ചു. മൂവാറ്റുപുഴയാറിന്റെ ഓളപ്പരപ്പില് ചുണ്ടന് വള്ളങ്ങളും മറ്റ് വള്ളങ്ങളും നിറഞ്ഞതോടെ മത്സരം ആവേശകരമായി. വിവിധ ടീമുകള് മാറ്റുരച്ച മത്സരത്തില് ആറ് റൗണ്ടുകളിലായാണ് വള്ളംകളി നടന്നത്. ഓരോ റൗണ്ടിലും വാശിയേറിയ പോരാട്ടമാണ് അരങ്ങേറിയത്. നദിയുടെ ഇരുകരകളിലും തിങ്ങിനിറഞ്ഞ ജനക്കൂട്ടം മത്സരത്തിന് ആവേശം പകര്ന്നു. ഏറെക്കാലത്തിന് ശേഷം മൂവാറ്റുപുഴയാര് വീണ്ടും ജലോത്സവത്തിന് വേദിയായത് നാട്ടുകാര്ക്കും ആഘോഷത്തിന്റെ ഭാഗമായി എത്തിയവര്ക്കും വേറിട്ട അനുഭവമായി. മത്സരത്തിന് ആവേശം പകര്ന്ന് മൂവാറ്റുപുഴയാറിലെക്കുള്ള ഹെലികേപ്റ്റര് പുഷ്പ വൃഷ്ടിയോടെയാണ് ജലോത്സവത്തിന് തുടക്കം കുറിച്ചത്
വള്ളംകളിയുടെ ഉദ്ഘാടനം ഡീന് കുര്യാക്കോസ് എംപി നിര്വഹിച്ചു. നഗരസഭ ചെയര്പേഴ്സണ് ജോയ്സ് മേരി ആന്റണി അധ്യക്ഷത വഹിച്ചു. മാത്യു കുഴല്നാടന് എംഎല്എ, നഗരസഭ വൈസ് ചെയര്മാന് പി എം അബ്ദുല് സലാം,ആര്ഡിഒ വി.ഇ അബ്ബാസ്,നഗരസഭാ കൗണ്സിലര്മാര്, ജനപ്രതിനിധികള്, വിവിധ രാഷ്ട്രീയ-സാമൂഹിക-സാംസ്കാരിക രംഗങ്ങളിലെ പ്രമുഖര് തുടങ്ങിയവര് ചടങ്ങില് പങ്കെടുത്തു.
ഓണത്തിന്റെ പാരമ്പര്യവും നാടിന്റെ കൂട്ടായ്മയും ആഘോഷമാക്കിയ ത്രിവേണി ഓണത്തിന്റെ ഭാഗമായി സംഘടിപ്പിച്ച വള്ളംകളി മൂവാറ്റുപുഴയുടെ സാംസ്കാരിക-വിനോദ രംഗത്തിന് പുതിയ ഉണര്വ് നല്കുമെന്ന് ചെയര്പേഴ്സണ് ജോയ്സ് മേരി ആന്റണി പറഞ്ഞു. വരും വര്ഷങ്ങളിലും ഇത്തരം ജലോത്സവങ്ങള് സംഘടിപ്പിച്ച് മൂവാറ്റുപുഴയാറിനെ കൂടുതല് സജീവമായ വിനോദസഞ്ചാര-ആഘോഷ കേന്ദ്രമാക്കി മാറ്റും. ഫൈബര് ചുണ്ടന് ലൂസേഴ്സ് ഫൈനലില് ഒന്നാം സ്ഥാനം വൈഗയും രണ്ടാം സ്ഥാനം തൃക്കുന്നപ്പുഴയും നേടി, ഫൈബര് വെപ്പ് ഫൈനലില് ഒന്നാം സ്ഥാനം സെന്റ് ആന്റണിയും പുത്തന് കണ്ടത്തില് രണ്ടാം സ്ഥാനവും കരസ്ഥമാക്കി, ഫൈബര് ചുണ്ടന് ഫൈനലില് മഹാദേവികാട് ഒന്നാം സ്ഥാനവും തത്വമസി രണ്ടാം സ്ഥാനവും നേടി മത്സരത്തില് മികവ് തെളിയിച്ചു.
