കോതമംഗലം : നെല്ലിക്കുഴി ഗ്രാമപഞ്ചായത്ത് 17, 18 വാര്ഡുകളിലൂടെ കടന്ന് പോകുന്ന ഊരംകുഴി -ചെറുവട്ടൂര്പള്ളിപ്പടി റോഡ് കാല്നട യാത്ര പോലും അസാധ്യമായ നിലയില് തകര്ന്ന് ചെളിയും വെള്ളക്കെട്ടും നിറഞ്ഞ് സഞ്ചാരയോഗ്യമല്ലാതെ ശോചനീയമായ അവസ്ഥയിലാണ്. നേരത്തെ പൊതുമരാമത്ത് വകുപ്പ് കിഫ്ബി പദ്ധതിയില് ഉള്പ്പെടുത്തി ഇരുപത്തിനാല് കോടിയോളം രൂപ വകയിരുത്തി നിര്മ്മാണം ആരംഭിച്ച പ്ളാമുടി- ഊരംകുഴി റോഡിന്റെ അവസാന ഭാഗം കൂടിയാണ് ഈ പ്രദേശം. എന്നാല് പ്രസ്തുത പദ്ധതി നിര്മ്മാണം തുടങ്ങി വര്ഷങ്ങള് പിന്നിട്ടിട്ടും പൂര്ത്തിയാക്കാതെ പാതിവഴിയില് ഉപേക്ഷിക്കപ്പെട്ട നിലയിലാണ് ഇപ്പോള് ഉള്ളത്. PWD റോഡ് ഏറ്റെടുത്ത സാഹചര്യത്തില് തദ്ദേശ സ്ഥാപനങ്ങള് റോഡ് കയ്യൊഴിയുകയും ജനപ്രതിനിധികള് തിരിഞ്ഞ് നോക്കാത്ത നിലയിലും പ്രദേശവാസികള് വര്ഷങ്ങളായി യാത്രാക്ളേശം നേരിടുകയാണ്.
മുസ്ലിം പള്ളി, ക്ഷേത്രം, പ്രാഥമീക ആരോഗ്യകേന്ദ്രം ,റേഷന് വിതരണ കേന്ദ്രം, ആയൂര്വേദ ആശുപത്രി, മറ്റ് സര്ക്കാര് സ്ഥാപനങ്ങളിലേക്കും തൊട്ടടുത്ത പട്ടണങ്ങളായ മൂവാറ്റുപുഴ, കോതമംഗലം നഗരങ്ങളിലേക്കും പ്രദേശവാസികള് യാത്ര ചെയ്യാന് ഉപയോഗിക്കുന്ന റോഡിന്റെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് ശക്തമായ പ്രതിഷേധത്തിനൊരുങ്ങുകയാണ് നാട്ടുകാര്. പൊതുമരാമത്ത് വകുപ്പ് ഉദ്യോഗസ്ഥരുടേയും കരാറുകാരുടേയും അനാസ്ഥ കാരണമായി ഒരു പ്രദേശത്തെ ജനങ്ങള് വര്ഷങ്ങളായി യാത്രാക്ളേശം അനുഭവിക്കേണ്ടി വരുന്ന സാഹചര്യത്തില് ഊരംകുഴി -ചെറുവട്ടൂര്പള്ളിപ്പടി റോഡ് സഞ്ചാരയോഗ്യമാക്കാന് നടപടി ആവശ്യപ്പെട്ട് ശക്തമായ ജനകീയ പ്രതിഷേധത്തിന് മുന്കയ്യെടുക്കാനും സമരപരിപാടികള്ക്ക് തുടക്കം കുറിക്കാനും പി.ഡി.പി.ചെറുവട്ടൂര് മേഖലാ കമ്മിറ്റി തീരുമാനിച്ചു.
ഷിഹാബ് കുരുംബിനാംപാറ അദ്ധ്യക്ഷത വഹിച്ച യോഗം പഞ്ചായത്ത് കമ്മിറ്റി പ്രസിഡന്റ് ഖാദര് ആട്ടായം ഉദ്ഘാടനം ചെയ്തു. പഞ്ചായത്ത് സെക്രട്ടറി അഷറഫ് ബാവ , മേഖല ഭാരവാഹികളായ ഷാജി കവലക്കല്, നിസാര് ഊരംകുഴി , ഷിയാസ് , കെരീം തട്ടുപറന്പില്, ജമാല് പടുത്താലുങ്കല് , കെ.എം.സൈഫുദ്ദീന് ,ഷിയാസ് പുതിയേടത്ത് ,റമിന്സ് മുഹമ്മദ് തുടങ്ങിയവര് പങ്കെടുത്തു.
