കോതമംഗലം: നെല്ലിക്കുഴിയില് കുളിക്കടവില് വെള്ളത്തില് മുങ്ങിത്താഴ്ന്ന രണ്ടു വയസുകാരന് രക്ഷകയായി 10 വയസുകാരി. നെല്ലിക്കുഴി സദ്ദാം നഗര് കാപ്പുചിറയ്ക്ക് സമീപമുള്ള കുളിക്കടവിലാണ് പിഞ്ചു കുഞ്ഞ് അപകടത്തില്പ്പെട്ടത്. മലപ്പുറം സ്വദേശികളായ മാതാപിതാക്കള്ക്കൊപ്പം കാപ്പുചിറയ്ക്കു സമീപത്തുള്ള ബന്ധുവീട്ടില് വിരുന്നെത്തിയതായിരുന്നു രണ്ടു വയസുള്ള ആണ്കുട്ടി. മാതാപിതാക്കള് അറിയാതെ കുളിക്കടവിലെ സ്റ്റെപ്പിലൂടെ ഇറങ്ങിയ കുട്ടി വെള്ളത്തില് മുങ്ങിത്താഴുകയായിരുന്നു.
ഈ സമയം സൈക്കിള് ചവിട്ടി അതുവഴി കടന്നുപോകുകയായിരുന്നു കാപ്പുചിറ കാപ്പുചാലി നൗഫല്- സബീന ദമ്പതികളുടെ മകള് 10 വയസുകാരി ഫാത്തിമ സഹ്റ. മുങ്ങിത്താഴുന്ന പിഞ്ചുകുട്ടിയുടെ കൈയുടെ അറ്റം ഫാത്തിമ സഹ്റയുടെ ശ്രദ്ധയില്പ്പെട്ടു. ഉടനെ സമചിത്തതയോടെ വെള്ളത്തില് ഇറങ്ങി പിഞ്ചുകുഞ്ഞിന്റെ ഉടുപ്പില് പിടിച്ച് കരയ്ക്ക് കയറ്റുകയായിരുന്നു. സംഭവം അറിഞ്ഞ നെല്ലിക്കുഴി പഞ്ചായത്ത് പ്രസിഡന്റ് സനീറ നസീര് ഉള്പ്പെടെയുള്ള ജനപ്രതിനിധികള് ഫാത്തിമ സഹ്റയ്ക്ക് അഭിനന്ദനവുമായി എത്തി.
