ഇടമലയാർ : പൊങ്ങിൻചുവട് ആദിവാസി കോളനിയിൽ വിവാഹം നടക്കുന്ന വസ്തിയ്ക്ക് സമീപമുള്ള തോട്ടിൽ നിന്ന് 5 മീറ്ററോളം നീളം വരുന്ന രണ്ട് രാജവെമ്പാലകളെയും 2.5 മീറ്ററോളം നീളം വരുന്ന ഒരു രാജവെമ്പാലയെയും ആണ് ഇന്നലെ വൈകിട്ട് 7 മണിയോടെ സുരക്ഷിതമായി പിടികൂടിയത്. മൂന്ന് രാജവെമ്പാലകളെ ഒരുമിച്ച് പിടികൂടുന്നത് ആദ്യത്തെ സംഭവമാണെന്നും ഇതിന് മുമ്പ് ഇങ്ങനെ കേട്ടുകേൾവി പോലുമില്ലെന്ന് രാജവെമ്പാലകളെ പിടികൂടുന്നതിൽ നിരവധി വർഷത്തെ പരിചയമുള്ള സെക്ഷൻ ഫോറസ്റ്റ് ഓഫീസർ ജെ.ബി സാബു പറഞ്ഞു.
15 വയസോളം പ്രായം വരുന്നവയാണ് വലിയ രണ്ട് രാജവെമ്പാലകൾ ഇതിൽ ഒന്ന് ആണും മറ്റൊന്ന് പെണ്ണുമാണ്. ചെറിയ രാജവെമ്പാലയും പെൺ വർഗ്ഗത്തിലുള്ളതാണ്. ഇടമലയാർ ഫോറസ്റ്റ് സ്റ്റേഷൻ ഡെപ്യൂട്ടി റെയിഞ്ച് ഓഫീസർ ടി.പി. പ്രമോദ് കുമാറിന്റെ നേതൃത്വത്തിൽ കോടനാട് സ്പെഷ്യൽ ഫോറസ്റ്റ് പ്രൊട്ടക്ഷൻ ഫോഴ്സിലെ സെക്ഷൻ ഫോറസ്റ്റ് ഓഫീസർ ജെ.ബി സാബു, ബീറ്റ് ഫോറസ്റ് ഓഫീസർമാരായ അൻവർ സാദിഖ്, സനോജ് കെ, ഫോറസ്റ്റ് വാച്ചർ ചെല്ലപ്പൻ വെളളക്കയ്യൻ, വാച്ചർമാരായ വിനോജ്, ബെന്നി എന്നിവരുൾപ്പെട്ട വനപാലക സംഘമാണ് പാമ്പുകളെ പിടികൂടിയത്.
