മൂവാറ്റുപുഴ : നഗരത്തില് ശനിയാഴ്ച നിരവധി ആളുകളെ ആക്രമിച്ച തെരുവ് നായയെ പിടികൂടി. ഞായറാഴ്ച രാവിലെ മുതല് മൂവാറ്റുപുഴ നഗരസഭ ആരോഗ്യ വിഭാഗം സ്ഥിരം സമിതി അധ്യക്ഷ പി രജിതയുടെ നേതൃത്വത്തില് ആരോഗ്യ വിഭാഗം ഉദ്യോഗസ്ഥരും, എറണാകുളത്തു നിന്നും ഉള്ള സംഘവും ചേര്ന്ന് നടത്തിയ തെരച്ചിലിനൊടുവിലാണ് വാഴപ്പിള്ളി ഐടിആര് റോഡില് വച്ച് നായയെ പിടികൂടിയത്. രാവിലെ മുതല് നായയെ പിടികൂടാനുള്ള ശ്രമം നടത്തി വരികയായിരുന്നെങ്കിലും ഉച്ചയോടെയാണ് നായയെ പിടികൂടാന് സാധിച്ചത്. എന്നാല് ഓട്ടോറിക്ഷയില് നഗരസഭയിലേക്ക് എത്തിക്കുന്നതിനിടയില് പിടികൂടിയ നായ ചത്തു.
നായയുടെ ജടം പോസ്റ്റുമോര്ട്ടം നടത്തിയാല് മാത്രമേ പേവിഷബാധ സംബന്ധിച്ചുള്ള വിവരങ്ങള് ലഭ്യമാവുകയുള്ളൂ. മണ്ണുത്തി വെറ്റിനറി ആശുപത്രിയില് തിങ്കളാഴ്ച രാവിലെ 9 ഓടെ നായയുടെ പോസ്റ്റ്മോര്ട്ടം നടത്താനുള്ള നടപടികള് സ്വീകരിച്ചു കഴിഞ്ഞതായി നഗരസഭാ ചെയ്യര്പേഴ്സണ് ജോയിസ് മേരി ആന്റണി പറഞ്ഞു. ശനിയാഴ്ച രാവിലെ മുതല് നഗരത്തിന്റെ വിവിധ ഭാഗങ്ങളിലായി 9ഓളം ആളുകളെയാണ് നായ ആക്രമിച്ചത്. ആക്രമണത്തില് പരിക്കേറ്റവര് മൂവാറ്റുപുഴ ജനറല് ആശുപത്രിയില് ചികിത്സ തേടിയിരുന്നു.
