കോതമംഗലം: മലയാളികളുടെ ആഘോഷവും പ്രതീക്ഷയുമായ വിഷുവിനെ വരവേല്ക്കാന് കോതമംഗലം സ്വദേശിയായ 75-കാരന് തന്റെ കൃഷിയിടത്തില് വിളവെടുപ്പിന്റെ തിരക്കിലാണ്. കോതമംഗലം, വാരപ്പെട്ടി സ്വദേശി പുന്നേക്കോട്ടയില് മഹറൂബ് എന്ന 75 കാരന് തന്റെ കഠിനാധ്വാനത്തിലൂടെ എല്ലാവര്ക്കും മാതൃകയായിരിക്കുകയാണ്. മണ്ണിനോടുള്ള സ്നേഹത്തിന് ഒരിക്കലും പ്രായം കാണില്ലെന്ന് തെളിയിക്കുന്ന കാഴ്ചകളാണ് മഹറൂബിന്റെ കൃഷിയിടത്തില് നമുക്ക് കാണാന് കഴിയുന്നത്.
വെള്ളരി, കുക്കുമ്പര്, പയര്, തണ്ണിമത്തന്, ചീര തുടങ്ങിയവയുടെ വിളവെടുപ്പാണ് നടന്നത്. തനിക്ക് കൃഷി ചെയ്യുന്നത് വളരെ ഇഷ്ടമാണെന്നും, കാര്ഷിക കുടുംബത്തില് ജനിച്ച താന് വളരെ ചെറുപ്പം മുതല് കൃഷി ചെയ്തുവരികയാണെന്നും ഇതാണ് തന്റെ സന്തോഷമെന്നും മഹറൂബ് പറഞ്ഞു. പ്രായം ഒരു തടസ്സമല്ല, ആഗ്രഹമുണ്ടെങ്കില് എല്ലാം സാധ്യമാണ് എന്ന് മഹറൂബിന്റെ ഈ അദ്ധ്വാനം പുതു തലമുറയ്ക്കു നല്കുന്ന ഒരു പാഠമാണ്.
