കോതമംഗലം :- നെല്ലിക്കുഴി ഗവൺമെന്റ് ഹൈസ്ക്കൂളിന്റെ സംരക്ഷണ ഭിത്തി നെല്ലിക്കുഴി പഞ്ചായത്ത് ദയാ ബഡ്സ് സ്കൂൾ കെട്ടിടത്തിനും സ്കൂൾ ബസ്സിനു മുകളിലേക്കും ഇടീഞ്ഞു വീണു. ഇന്നലെ രാത്രിയാണ് ഹൈസ്കൂളിൻ്റെ സംരക്ഷണഭിത്തി തൊട്ടു ചേർന്ന് പ്രവർത്തിക്കുന്ന ദയാ ബഡ്സ് സ്കൂളിലേക്ക് പതിച്ചത്. മുറ്റത്ത് പാർക്ക് ചെയ്തിരുന്ന സ്കൂൾ ബസിനും കെട്ടിടത്തിനും കേടുപാടുകൾ സംഭവിച്ചിട്ടുണ്ട്. സ്കൂളിന്റെ പ്രവർത്തന സമയമല്ലാത്തതിനാൽ വൻ ദുരന്തം ഒഴിവായി. ബഡ്സ് സ്കൂളിന് ചേർന്ന് വളരെ ഉയരത്തിലായി വേണ്ടത്ര സംരക്ഷണമില്ലാതെയാണ് ഹൈസ്കൂളിന്റെ പുതിയ കെട്ടിടം നിർമ്മിച്ചിരിക്കുന്നത് എന്ന് പരാതി ഉയർന്നിട്ടുണ്ട്.
നിർമ്മാണത്തിന്റെ അപാകതയാണ് തകർച്ചയ്ക്ക് കാരണമെന്നും കാരണക്കാരായവർക്കെതിരെ നിയമ നടപടി സ്വീകരിക്കണമെന്നും പൊതുപ്രവർത്തകനും മുൻ ഗ്രാമ പഞ്ചായത്ത് അംഗവുമായ അലി പടിഞ്ഞാറെച്ചാലിൽ പറഞ്ഞു. സ്കൂൾ ബസിൻ്റെയും കെട്ടിടത്തിൻ്റെയും തകരാറുകൾ ഉടൻ പരിഹരിക്കാൻ നടപടിയെടുത്തിട്ടുണ്ടെന്നും ക്ലാസുകൾ മുടങ്ങില്ലെന്നും നെല്ലിക്കുഴി ഗ്രാമപഞ്ചായത്ത് പ്രസിഡൻ്റ് PM മജീദ് പറഞ്ഞു.
