മൂവാറ്റുപുഴ: വാഴപ്പിള്ളിയില്‍ മൂവാറ്റുപുഴ സിവില്‍ സ്റ്റേഷന് സമീപം ടോറസ് ലോറിയും, ബൈക്കും കൂട്ടിയിടിച്ചുണ്ടായ അപകടത്തില്‍ ഒരാള്‍ക്ക് ദാരുണാന്ത്യം. ശനിയാഴ്ച വൈകിട്ട് 4.30 ഓടെയുണ്ടായ അപകടത്തില്‍ ബൈക്ക് യാത്രികനായ പുനലൂര്‍ സ്വദേശി ബിജു (59) ആണ് മരിച്ചത്. ബിജുവിനൊപ്പം ഉണ്ടായിരുന്ന മൂലമറ്റം സ്വദേശി ഹരി (28) ക്ക് ഗുരുതരമായി പരിക്കേറ്റു. മൂവാറ്റുപുഴ ഭാഗത്ത് നിന്നും പട്ടിമറ്റം ഭാഗത്തേക്ക് പോവുകയായിരുന്ന ബൈക്ക് മറ്റൊരു വാഹനത്തെ മറികടക്കാന്‍ ശ്രമിക്കുന്നതിനിടയില്‍ എതിര്‍ ദിശയില്‍ വരികയായിരുന്ന ടോറസ് ലോറിയുമായി കൂട്ടിയടിക്കുകയായിരുന്നു.
അപകടത്തെ തുടര്‍ന്ന് ടോറസ് ലോറിക്കടിയില്‍ കുടുങ്ങിയ ബിജുവിനെ മൂവാറ്റുപുഴ ഫയര്‍ഫോഴ്‌സ് എത്തിയാണ് പുറത്തെടുത്തത്. ബിജുവിനെയും ഹരിയേയും ഉടന്‍തന്നെ മൂവാറ്റുപുഴ ജനറല്‍ ആശുപത്രിയില്‍ എത്തിച്ചെങ്കിലും ബിജുവിന്റെ ജീവന്‍ രക്ഷിക്കാനായില്ല. ഇരുവരും മടവൂര്‍ ഭാഗത്തെ വര്‍ക്ക് ഷോപ്പിലെ ജീവനക്കാരാണ്. ബിജുവിന്റെ മൃതദേഹം പോസ്റ്റ്‌മോര്‍ട്ടത്തിന് ശേഷം ബന്ധുക്കള്‍ക്ക് വിട്ട് നല്‍കും.സീനിയര്‍ ഫയര്‍ ആന്റ് റെസ്‌ക്യൂ ഓഫീസര്‍ ജയന്‍ മാത്യുവിന്റെ നേതൃത്വത്തില്‍ ഫയര്‍ ആന്റ് റെസ്‌ക്യൂ ഓഫീസര്‍മാരായ അനിബെന്‍ കുര്യാക്കോസ്, അജേഷ് ടി.ആര്‍, പി.എല്‍ ഷാലിന്‍, ഹരികൃഷ്ണന്‍ കെ.സി, കെ ഇസ്മായില്‍, ഹോം ഗാര്‍ഡുമാരായ ടി.കെ ജയ്സിങ്, ഷിജു സോമന്‍ എന്നിവര്‍ രക്ഷാ പ്രവര്‍ത്തനത്തില്‍ പങ്കെടുത്തു
