കോതമംഗലം: ജോസ് കെ മാണി ക്യാപ്റ്റനായ എല്‍ഡിഎഫ് വികസനമുന്നേറ്റ ജാഥയുടെ പ്രചരണാര്‍ഥം ആന്റണി ജോണ്‍ എംഎല്‍എ ക്യാപ്റ്റനും, സിപിഐ കോതമംഗലം മണ്ഡലം സെക്രട്ടറി പി.ടി ബെന്നി വൈസ് ക്യാപ്റ്റനും, കേരള കോണ്‍ഗ്രസ് എം നിയോജക മണ്ഡലം പ്രസിഡന്റ് എന്‍.സി ചെറിയാന്‍ മാനേജരുമായ എല്‍ഡിഎഫ് കോതമംഗലം മണ്ഡലം കമ്മിറ്റിയുടെ പ്രചരണ ജാഥക്ക് വടാട്ടുപാറയില്‍ ഉജ്ജ്വല തുടക്കം.
വ്യാഴാഴ്ച വൈകിട്ട് നാലിന് സിപിഐ എക്‌സിക്യൂട്ടീവ് അംഗം മുല്ലക്കര രത്‌നാകരന്‍ ഉദ്ഘാടനം ചെയ്തു. സിപിഐഎം ഏരിയാ കമ്മറ്റി അംഗം പി.കെ പൗലോസ് അധ്യക്ഷനായി. ജാഥ ക്യാപ്റ്റന്‍ ആന്റണി ജോണ്‍ എംഎല്‍എ, സിപിഐ എം സെക്രട്ടറിയറ്റംഗം ആര്‍ അനില്‍കുമാര്‍, ഏരിയ സെക്രട്ടറി കെ.എ ജോയി, ജാഥ വൈസ് ക്യാപ്റ്റന്‍ പി.ടി ബെന്നി, ജാഥ മാനേജര്‍ എന്‍.സി ചെറിയാന്‍, എല്‍ഡിഎഫ് നേതാക്കളായ എം.കെ രാമചന്ദ്രന്‍, കെ.കെ ശിവന്‍, മനോജ് ഗോപി, ഷാജി പീച്ചക്കര, സാജന്‍ അമ്പാട്ട്, സണ്ണി പുതുശ്ശേരി, ജിജി പുളിക്കന്‍ തുടങ്ങിയവര്‍ പ്രസംഗിച്ചു.
വെള്ളിയാഴ്ച രാവിലെ ഒന്‍പതിന് നേര്യമംഗലത്ത് നിന്നാരംഭിക്കുന്ന ജാഥ കവളങ്ങാട്, പല്ലാരിമംഗലം, വാരപ്പെട്ടി പഞ്ചായത്തുകളില്‍ പര്യടനം നടത്തി വൈകിട്ട് അഞ്ചിന് കോഴിപ്പിള്ളിയില്‍ സമാപിക്കും. സമാപന സമ്മേളനം സി.കെ ഹരികൃഷ്ണന്‍ ഉദ്ഘാടനം ചെയ്യും. ഫെബ്രുവരി എട്ടുവരെ മണ്ഡലത്തില്‍ ജാഥാപര്യടനം നടക്കും.
