കോട്ടപ്പടി : പ്രകൃതിയുടെ അനുപമ വരദാനമായി കോട്ടപ്പടി കണ്ണക്കടയിലെ ചെക്ക് ഡാം വെള്ളച്ചാട്ടം. കാടിന്റെ ഓരത്ത് സ്ഥിതിചെയ്യുന്ന മനുഷ്യനിർമ്മിത ചെക്ക് ഡാം ആണ് ദൃശ വിരുന്ന് ഒരുക്കുന്നത്. ഇരുപത് വർഷങ്ങൾക്ക് മുൻപ് വനം വകുപ്പ് നിർമ്മിച്ചതാണ് കണ്ണക്കട ചെക്ക് ഡാം. കണ്ണക്കടയുടെ താഴെയുള്ള പ്രദേശമായ പ്ലാമുടിയിലെ ജലസേചനത്തിനും മണ്ണൊലിപ്പ് തടയുന്നതിനുമായാണ് കർഷകരുടെയും വനം സംരക്ഷണ സമിതിയുടെയും ആവശ്യപ്രകാരം വനം വകുപ്പ് ചെക്ക് ഡാം പണിതത്. കോട്ടപ്പടിയിൽ നിന്നും അഞ്ചു കിലോമീറ്ററും, വന അതിർത്തിയായ കണ്ണക്കടയിൽ നിന്ന് 150 മീറ്ററുമാണ് ഈ ജലപാതത്തിലേക്കുള്ള ദൂരം. സ്വഭാവിക വനം നിലനിൽക്കുന്നതും പാറയുടെ മുകളിൽ വെള്ളം പതിച്ചു ചിന്നിച്ചിതറി നീർച്ചാലായി ഒഴുകുമ്പോൾ ഉണ്ടാകുന്ന ആരവവും കൂടിച്ചേരുമ്പോൾ സന്ദർശകർക്ക് വലിയൊരു അനുഭൂതിയാണ് കണ്ണക്കട വെള്ളച്ചാട്ടം സമ്മാനിക്കുന്നത്.

തെന്നിത്തെറിച്ച പാറ മടക്കുകളും , കാട്ടാന ശല്യവും ഉള്ള പ്രദേശമായതുകൊണ്ട് സന്ദർശകർ ജാഗ്രത പുലർത്തണമെന്ന് നാട്ടുകാർ ഓർമിപ്പിക്കുന്നു.

കൊച്ചി : വരച്ച് വരച്ച് ആ വരയിലൂടെ അപൂർവ ഭാഗ്യം ലഭിച്ച ആത്മസന്തോഷത്തിലാണ് കോട്ടയം സ്വദേശിയായ നവീൻ ചെറിയാൻ അബ്രഹാം . കോൺഗ്രസിന്റെ ദേശീയ നേതാവ് രാഹുൽ ഗാന്ധിയെ വരച്ച് അദ്ദേഹത്തെ നേരിട്ട് കണ്ട് കയ്യൊപ്പ് ചാർത്താനുള്ള അവസരം ലഭിച്ച സന്തോഷത്തിലാണ് നവീൻ എന്ന ചിത്രകാരൻ.കഴിഞ്ഞ ദിവസം ഭാരത് ജോഡോ യാത്രയുടെ ഭാഗമായി ആലപ്പുഴ ഹരിപ്പാട് വച്ചാണ് വരയിൽ ഇന്ദ്രജാലം തീർക്കുന്ന നവീൻ എന്ന 24കാരന് രാഹുൽ ഗാന്ധിയെ നേരിട്ട് കണ്ട് താൻ വരച്ച രാഹുലിന്റെ മുഖ ചിത്രം കാണിക്കാനുള്ള അവസരം ലഭിച്ചത്. തന്റെ ബന്ധുവായ ഫിൽസൺ മാത്യു വഴി ആന്റോ ആന്റണി എം. പി, ഷാഫി പറമ്പിൽ എം എൽ എ എന്നിവർ മുഖാന്തിരമാണ് നവിൻന് താൻ വരച്ച രാഹുൽ ചിത്രം അദ്ദേഹത്തെ കാണിക്കാനുള്ള അവസരം ഒരുങ്ങിയത്.കേരള പോലീസിന് പുറമെ നിറ തോക്കുമായി 8 ഓളം വരുന്ന കേന്ദ്ര സേന സുരക്ഷ ഒരുക്കുന്ന രാഹുലിന്റെ അടുത്ത് ചേർന്ന് നിന്ന് തന്റെ ചെറിയ വരയിലൂടെ അദ്ദേഹത്തിന്റെ മനസ് കവർന്നെടുക്കുവാൻ സാധിച്ചത് വളരെ വലിയ ഭാഗ്യമായി കാണുന്നുവെന്ന് നവീൻ പറഞ്ഞു.

ഒക്യൂപ്പേഷണൽ തെറാപ്പിസ്റ്റായ നവീൻ വരയെ കൂടെ കൂട്ടിയിട്ട് 5 വർഷമേ ആയിട്ടുള്ളു. സ്കൂൾ വിദ്യാഭ്യാസ കാലത്തൊന്നും വരയുടെ ലോകത്തേക്ക് എത്തിപെടാതിരുന്ന ഈ ചെറുപ്പക്കാരൻ ഇപ്പോൾ വരയുടെയും, നിറങ്ങളുടെയും ലോകത്താണ്. കോട്ടയം പാമ്പാടി ക്രോസ്സ് റോഡ്സ് ഹയർ സെക്കന്ററി സ്കൂളിൽ നിന്ന് ഹൈസ്കൂൾ വിദ്യാഭ്യാസവും, മണർകാട് സെന്റ് മേരീസ്‌ ഹയർ സെക്കന്ററി സ്കൂളിൽ നിന്ന് പ്ലസ് ടു പഠനവും പൂർത്തിയാക്കി മണിപ്പാൽ അക്കാദമി ഓഫ് ഹയർ എഡ്യൂക്കേഷനിൽ തെറാപ്പി കോഴ്സ് പടിക്കുന്നതിനിടത്തിലാണ് യാതൃശ്ചികമായി വരയിലേക്ക് വഴുതി വീണത്. പഠനാവശ്യത്തിനായി റെക്കോർഡ് ബുക്കിൽ ചിത്രം വരച്ചപ്പോൾ അത്‌ കണ്ട് അധ്യാപകരും, സഹപാഠികളും അഭിനന്ദിച്ചു. അങ്ങനെയാണ് ചിത്രങ്ങളെയും, നിറങ്ങളെയും കൂട്ട് പിടിക്കാൻ തീരുമാനിച്ചത്. സ്വന്തം ചിത്രവും, മെക്കാനിക്കൽ എൻജിനിയർ ആയ ജേഷ്ഠൻ നിധിൻന്റെ ചിത്രവും വരച്ചു വിജയിച്ചതോടെ ആത്മവിശ്വാസം ഇരട്ടിച്ചു.

നിരവധി പ്രമുഖ വ്യക്തിത്വങ്ങളെയാണ് ഈ അഞ്ച് വർഷത്തിനിടയിൽ നവീൻ തന്റെ ക്യാൻവാസിൽ പകർത്തിയത്. അതിൽ മലയാളത്തിന്റെ നടന വിസ്മയം മോഹൻലാൽ മുതൽ യുവ താരങ്ങളായ നിവിൻ പോളിയും, ടോവിനോ തോമസും, ആസിഫ് അലിയും വരെ ഉൾപെടും. വിശ്വ പുരുഷൻ ഡോ ശശി തരൂർ, മുൻ മുഖ്യ മന്ത്രി മാരായ വി എസ് അച്യുതാനന്ദൻ, ഉമ്മൻ ചാണ്ടി, യാക്കോബായ സഭയുടെ ശ്രേഷ്ഠ കത്തോലിക്കാ ബസേലിയസ് തോമസ് പ്രഥമൻ ബാവ ഇതിനു പുറമെ ഏറ്റവും അവസാനമായി ദേശീയ നേതാവ് രാഹുൽ ഗാന്ധിയെ വരെ വരച്ചു അദ്ദേഹത്തെയും ജന മനസുകളെയും അതിശയിപ്പിച്ചിരിക്കുകയാണ് ഈ ചെറുപ്പക്കാരൻ .താൻ വരയ്ക്കുന്ന ചിത്രങ്ങൾ അവർക്ക് നേരിട്ട് സമ്മാനിക്കുന്നതോടൊപ്പം ആ പ്രമുഖ വ്യക്തികളുടെ കയ്യൊപ്പും വാങ്ങിയാണ് നവീൻ മടങ്ങുന്നത്. ഇത്തരത്തിൽ കയ്യൊപ്പ് ചാർത്തിയ 17 ൽ പരം ചിത്രങ്ങൾ തന്റെ കോട്ടയം പാമ്പാടിയിലെ നെൽമല വീട്ടിൽ നിധിപോലെ സൂക്ഷിച്ചിരിക്കുകയാണ് നവീൻ .

ഗ്രാഫൈറ്റ് പെൻസിലും, ചാർകോൾ പെൻസിലും ഉപയോഗിച്ചാണ് ജീവൻ തുടിക്കുന്ന ഈ മിഴിവാർന്ന ചിത്രങ്ങൾ നവീൻ ഒരുക്കുന്നത്. കോട്ടയം, പാമ്പാടി നാലുവയലിൽ നെൽമല എബ്രഹാം ഈപ്പന്റെയും, റിനി അബ്രഹാമിന്റെയും രണ്ട് ആണ്മക്കളിൽ ഇളയായളാണ് വർണ്ണലോകത്തെ ഈ പുത്തൻ താരോദയം.കൊച്ചി ആസ്റ്റർ മെഡി സിറ്റിയിൽ ഒക്യൂ പ്പേഷണൽ തെറാപ്പിസ്റ്റായി ജോലിനോക്കിയിരുന്ന നവീൻ ഇംഗ്ലണ്ടിലേക്ക് ചേക്കേറാനുള്ള തയ്യാറെടുപ്പിലാണ്.

ചിത്രം : നവീൻ താൻ വരച്ച രാഹുൽ ഗാന്ധിയുടെ ചിത്രവുമായി അദ്ദേഹത്തിന്റ സമീപം.

നേരിയമംഗലം : വാഹന യാത്രക്കാരുടെ പേടിസ്വപ്നമാണ് ചാക്കോച്ചി വളവ്. കൊച്ചി -ധനുഷ്‌കോടി ദേശീയ പാതയുടെ ഭാഗമായ നേര്യമംഗലം ചാക്കോച്ചി വളവിലൂടെ ആയിരക്കണക്കിന് വാഹനങ്ങലാണ് ദിവസേന കടന്ന് പോകുന്നത്. ചെറുതും വലുതുമായ നിരവധി വാഹന അപകടങ്ങളാണ് ഈ മേഖലയിൽ നടന്നിട്ടുള്ളത്. രാവിലെ നടന്ന കെ എസ് ആർ ടി സി ബസ് അപകടത്തിൽ മരണപെട്ട വാളറ കുളമാവുംകുഴി സ്വദേശി പാലക്കൽ സജി (40 ) വേർപാട് നാടിനു നൊമ്പരമായി. അപകടം നടക്കുന്നതിന് 3 കിലോമീറ്റർ പുറകിൽ വാളറ കെ ടി ഡി സി പടിയിൽ നിന്നാണ് സജിയും, പിതാവ് ജോസ്ഫ്ഉം ഈ ബസിൽ കയറുന്നത്. ബസിൽ കയറിയ അവസാന യാത്രക്കാരനും സജീവ് ആയിരുന്നു. സജീവും, പിതാവ് ജോസഫ്നും ടിക്കറ്റ് കൊടുത്തു കഴിഞ്ഞ് ഏതാനും നിമിഷങ്ങൾക്കുള്ളിലാണ് അപകടം സംഭവിക്കുന്നത്. ചികിത്സക്കായി സജിയെ കൊണ്ട് പിതാവ് ജോസഫ് എറണാകുളത്തെ ആശുപത്രിയിലേക്ക് പോകുന്നതിനിടയിലാണ് ഈ ദുരന്തം. പരിക്ക് പറ്റിയ ജോസഫ് കോതമംഗലത്തെ സ്വകര്യ ആശുപത്രിയിൽ ചികിത്സയിലാണ്.

ഇന്ന് നടന്ന ksrtc മൂന്നാർ എറണാകുളം ബസിന്റെ അപകടം കൂടി ചാക്കോച്ചി എന്ന ബസ് സമ്മാനിച്ച സ്ഥല നാമത്തിലേക്ക് എഴുതിച്ചേർക്കുകയാണ്. ഇരുപത് വർഷങ്ങൾക്ക് മുൻപ് കോതമംഗലം-നേരിയമംഗലം-ആറാം മൈൽ വഴി – മാമലക്കണ്ടം സർവീസ് നടത്തിയിരുന്ന പ്രൈവറ്റ് ബസ് ആയിരുന്നു ചാക്കോച്ചി. അന്നത്തെ ബസിന്റെ സ്റ്റിയറിങ് പ്രശ്‌നവും, ഡ്രൈവറുടെ ഒരു കൈയുടെ ബലക്കുറവും മൂലമാണ് അപകടം നടന്നതെന്നും നിരവധി യാത്രക്കാർ മരിക്കുവാൻ ഇടവന്നതുമെന്ന റിപ്പോർട്ടിന്റെ അടിസ്ഥാനത്തിൽ സർക്കാർ ഇടപെടൽ ഉണ്ടാകുകയായിരുന്നു. തുടർന്ന് അംഗ പരിമിതി ഉള്ളവരെ ഡ്രൈവർ ജോലിയിൽ നിന്നും വിലക്കുന്ന നിയമം കർക്കശമായി നടപ്പിലാക്കുകയായിരുന്നു. നിരവധി നാളുകൾ വാർത്തകളിൽ ഇടം പിടിച്ച ചാക്കോച്ചി ബസ് അപകടം നടന്ന സ്ഥലത്തിന് കാലക്രമേണ ചാക്കോച്ചി വളവ് എന്ന നാമകരണം ലഭിക്കുകയായിരുന്നു. അന്ന് അപകടത്തിൽ പെട്ട ചാക്കോച്ചി ഇന്നും ഈ കൊക്കയുടെ അഗാതത്തിൽ അന്ത്യവിശ്രമം കൊള്ളുകയാണെന്ന സവിശേഷതയും നാട്ടുകാർ ചൂണ്ടിക്കാണിക്കുന്നു.