യുവതിയെ ശല്യം ചെയ്തതെന്ന് തെറ്റിദ്ധരിച്ചു; വിദ്യാർത്ഥിയെ വീട്ടിൽക്കയറി ആക്രമിച്ചു, നാല് പേർക്കെതിരെ കേസ്.

കോതമംഗലം: പല്ലാരിമംഗലത്ത് പ്ലസ് വൺ വിദ്യാർത്ഥിയെ ആളുമാറി വീട്ടിൽക്കയറി മർദ്ദിച്ച കേസിൽ നാല് പേർക്കെതിരെ പോത്താനിക്കാട് പോലീസ് കേസെടുത്തു. കഴിഞ്ഞ ചൊവ്വാഴ്ച വൈകിട്ടാണ് മടിയൂർ സ്വദേശിയായ 16-കാരന് മർദ്ദനമേറ്റത്. വിദ്യാർത്ഥിയുടെ വീട്ടിലെത്തിയ നാൽവർ സംഘം അതിക്രൂരമായി മർദ്ദിച്ച ശേഷം കാറിൽ കയറ്റി കൊണ്ടു പോകുകയായിരുന്നു. റോഡിലൂടെ നടന്നുപോയ യുവതിയെ ആരോ ശല്യം ചെയ്തിരുന്നു. ഈ കുട്ടിയാണ് യുവതിയെ ശല്യം ചെയ്തതെന്ന് തെറ്റിദ്ധരിച്ചാണ് വീട്ടിൽക്കയറി ആക്രമണം നടത്തിയത്.

യുവതിയുടെ വീട്ടിൽ വിദ്യാർത്ഥിയെ എത്തിച്ചപ്പോഴാണ് ആള് മാറിയെന്ന് മനസിലായത്. പോത്താനിക്കാട് പോലീസ് നാല് പേർക്കെതിരെ കേസെടുത്ത് അന്വേഷണം ആരംഭിച്ചു. നിരപരാധിയായ തന്നെ അതിക്രൂരമായി മർദ്ദിച്ചെന്ന് കോതമംഗലത്ത് സ്വകാര്യ ആശുപത്രിയിൽ ചികിത്സയിൽ കഴിയുന്ന വിദ്യാർത്ഥി പറഞ്ഞു.