പെരുമ്പാവൂർ : ലോക്ക് ഡൗണിനെ തിരികെ വരുന്ന മണ്ഡലത്തിലുള്ളവർക്ക് മതിയായ ഇൻസ്റ്റിറ്റ്യൂഷണൽ ക്വാറന്റൈൻ സൗകര്യം ലഭ്യമാക്കണമെന്ന് ആവശ്യപ്പെട്ട് എൽദോസ് കുന്നപ്പിള്ളി എം.എൽ.എ മുഖ്യമന്ത്രിക്ക് കത്ത് നൽകി. ഇതര നാടുകളിൽ നിന്ന് തിരികെ വരുന്നവരിൽ ഭൂരിഭാഗം ആളുകൾക്കും വീട്ടിൽ സൗകര്യങ്ങൾ ലഭ്യമല്ല. അതിനാൽ ഇവർക്ക് ഇൻസ്റ്റിറ്റ്യൂഷണൽ ക്വാറന്റൈൻ സൗകര്യം ആവശ്യമാണ്.
സ്വദേശത്തും വിദേശത്തും നിന്നും തിരികെ എത്തുന്നവർക്ക് ഒരേ രീതിയിലുള്ള പരിഗണന നൽകണം. മറ്റു സംസ്ഥാനങ്ങളിൽ കുടുങ്ങി പോയവർ തിരികെ എത്തുമ്പോൾ ഹോം ക്വാറന്റൈനിലേക്ക് അയക്കുന്നു എന്ന ആക്ഷേപം ഉണ്ട്. സ്വന്തം വീട്ടിൽ ഒരു മുറിയും അനുബന്ധമായി ശുചിമുറി സൗകര്യവും ലഭ്യമായവർക്കാണ് ഹോം ക്വാറന്റൈൻ സൗകര്യം നൽകുന്നത്. ഇത് ഉറപ്പ് വരുത്തേണ്ടത് ആരോഗ്യ വകുപ്പും തദ്ദേശ സ്വയംഭരണ വകുപ്പും ചേർന്നാണ്. വീട്ടിൽ മുതിർന്ന വ്യക്തികളോ മറ്റു രോഗ ബാധിതരോ ഉണ്ടെങ്കിൽ ഹോം ക്വാറന്റൈൻ അനുവദിക്കില്ല. അവർക്ക് ഇൻസ്റ്റിറ്റ്യൂഷണൽ ക്വാറന്റൈൻ സെന്ററുകളിൽ എത്തിച്ചു പരിചരിക്കണം എന്നാണ് എം.എൽ.എ ആവശ്യപ്പെടുന്നത്.
