- ജെറിൽ ജോസ് കോട്ടപ്പടി
കോതമംഗലം : അറാക്കപ്പിൽ നിന്നും ഇടമലയാർ ഹോസ്റ്റലിൽ സമരം ചെയ്യുന്ന ആദിവാസി കുടുംബങ്ങൾ അവഗണനയുടെ വക്കിൽ എന്ന് കുടുംബങ്ങൾ ആരോപിക്കുന്നു. തങ്ങളിൽ പലർക്കും വാക്സിൻ പോലും കിട്ടിയിട്ടില്ല എന്ന് കുടുംബങ്ങൾ ആരോപിക്കുന്നു. ജൂലൈ 6 നു അറാക്കപ്പിൽ നിന്നും പോന്ന ശേഷം തങ്ങളുടെ കാര്യങ്ങൾ ആരും തന്നെ അന്വേഷിക്കുന്നില്ല എന്ന പരാതിയാണുള്ളത് . നിലവിൽ സമരം ചെയ്യുന്ന ആദിവാസി കുടുംബങ്ങളിൽ 14 പേർക്ക് ആദ്യ ഡോസ് വാക്സിൻ പോലും കിട്ടിയിട്ടില്ല. എട്ടുപേർക്ക് ജൂൺ പതിനൊന്നാം തീയതി ആണ് ആദ്യ ഡോസ് കിട്ടിയത്. 112 ദിവസത്തിനുള്ളിൽ രണ്ടാം ഡോസ് വാക്സിൻ എടുക്കണം എന്ന് ഗവൺമെന്റ് ഓർഡർ നിലനിൽക്കെ നിങ്ങൾക്ക് അത് ലഭ്യമാക്കാൻ ആരും മുൻകൈ എടുത്തിട്ടില്ല. ചുരുക്കം ചില ആളുകൾക്ക് മാത്രമേ കിട്ടിയിട്ടുള്ളൂ അതും അറാക്കപ്പിൽ നിന്നും പോരുന്നതിനു മുമ്പ് മാത്രം.
നിലവിൽ നാടു ഒട്ടും വാക്സിൻ എടുക്കാത്ത ആളുകളെ കണ്ടെത്തി വാക്സിൻ കൊടുക്കുമ്പോഴാണ് ആദിവാസി കുടുംബങ്ങളോട് ഉള്ള ഈ അവഗണന. നിലവിൽ താമസിക്കുന്ന ട്രൈബൽ ഹോസ്റ്റലിൽ നിന്നും ഏതുനിമിഷവും ഇറക്കി വിട്ടേക്കാം എന്ന ഭയത്തിലാണ് ഓരോ ദിവസവും ആദിവാസി കുടുംബങ്ങൾ കഴിഞ്ഞുകൂടുന്നത്. സ്കൂൾ തുറക്കാറായി ഒട്ടുമിക്ക കുട്ടികൾക്കും കടുത്ത ദേഹ വേദനയും ജലദോഷവും മറ്റ് ശാരീരിക ബുദ്ധിമുട്ടുകളും ഉണ്ട്. തങ്ങൾ വന്ന ആഴ്ചയിൽ ആരോഗ്യ വകുപ്പിന്റെ ഒരു പരിശോധന ഉണ്ടായെങ്കിലും അതിനുശേഷം യാതൊരു നടപടിയും അധികൃതരുടെ ഭാഗത്തുനിന്ന് ഉണ്ടായില്ല. മുതിർന്നവരിൽ പലർക്കും കടുത്ത പനി കഴിഞ്ഞു പോയിട്ടേ ഉള്ളൂ അതിന്റെ ബുദ്ധിമുട്ടുകൾ ഇപ്പോഴുമുണ്ട്.
ആരോഗ്യ വകുപ്പ് ഇടപെട്ട് അടിയന്തരമായി ഒരു മെഡിക്കൽ ക്യാമ്പ് സംഘടിപ്പിക്കണം എന്നാണ് സമരം ചെയ്യുന്നവരുടെ ആവശ്യം. 11 കുടുംബങ്ങൾ ഒരു കൂരയ്ക്കു കീഴിൽ താമസിക്കുമ്പോൾ പകർച്ചവ്യാധികൾ പടർന്നു പിടിക്കാനുള്ള സാധ്യതകളും തള്ളിക്കളയാനാകില്ല. ശക്തമായ പനിയും തലവേദനയും ആയി നാലുദിവസമാണ് എണീക്കാൻ വയ്യാതെ കിടന്നത്, പുറത്തു നിന്ന് മരുന്ന് മേടിക്കാൻ പോലും ഉള്ള പൈസ കയ്യിൽ ഇല്ല. ഗവൺമെന്റ് ഒരു ഇടപെട്ട് ഒരു പരിശോധനാക്യാമ്പ് ഒരുക്കുമെന്നാണ് കരുതുന്നത് എന്ന് ഊരു മൂപ്പൻ തങ്കപ്പൻ വെളിപ്പെടുത്തുന്നു.
