പോത്താനിക്കാട്: പല്ലാരിമംഗലം ഗ്രാമ പഞ്ചായത്തിലെ പുലിക്കുന്നേപ്പടി , ഈട്ടിപ്പാറ തുടങ്ങിയ സ്ഥലങ്ങളിൽ അരങ്ങേറിയ മോഷണ പരമ്പരകളിലൂടെ നാടിനെ ഭീതിയിലായ്ത്തിയ മോഷ്ടാക്കളെ ചുരുങ്ങിയ ദിവസം കൊണ്ട് അതിവിദഗ്ദമായി പിടികൂടി നിയമത്തിന് മുന്നിൽ കൊണ്ടുവന്ന് ജനങ്ങളുടെ ജീവനും സ്വത്തിനും സംരക്ഷണം നൽകുന്നതിന് വേണ്ടി അശ്രാന്ത പരിശ്രമം നടത്തിയ പോത്താനിക്കാട് പോലീസ് സ്റ്റേഷനിലെ പോലീസ് ഉദ്യോഗസ്ഥർക്ക് അടിവാട് ഹീറോയഗ്സ് ക്ലബ്ബ് & റീഡിംഗ് റൂം പുരസ്ക്കാരവും മധുര പലഹാരവും വിതരണം ചെയ്തു . അന്വേഷണത്തിന് നേതൃത്വം നൽകിയ സ്റ്റേഷൻ എസ്.എച്ച്.ഒ സർക്കിൾ ഇൻസ്പക്ടർ നോബിൾ മാനുവൽ , സബ് ഇൻസ്പെക്ടർ രാജേഷ് കെ.കെ , എസ്.സി.പി.ഒ സലിം കെ.എം , എ.എസ്.ഐ അഷ്റഫ് സി.പി ,ബേബി ജോസഫ് , അജീഷ് കുട്ടപ്പൻ തുടങ്ങിയവർക്കാണ് പുരസ്ക്കാരം നൽകി ആദരിച്ചത് . തുടർന്ന് സ്റ്റേഷനിലെ മുഴുവൻ പോലീസ് ഉദ്യോഗസ്ഥർക്കും മധുര പലഹാരവും വിതരണം ചെയ്തു. ഇത്തരത്തിലുള്ള പുരസ്ക്കാരങ്ങൾ കൂടുതൽ ഉണർന്ന് പ്രവർത്തിക്കാൻ കഴിയുമെന്നും നാട്ടിലെ ജനങ്ങളുടെ ജീവനും സ്വത്തിനും സംരക്ഷണം നൽകാൻ എക്കാലവും ഞങ്ങൾ പ്രതിജ്ഞാബദ്ധരാണ് എന്നും അതോടൊപ്പം യുവജനങ്ങളിൽ വർദ്ധിച്ച് വരുന്ന ലഹരി ഉപയോഗത്തിലൂടെ നാട്ടിൽ നടമാടികൊണ്ടിരിക്കുന്ന അക്രമങ്ങൾക്കെതിരെ ക്ലബ്ബുകൾ ബോധവത്ക്കരണ പരിപാടികൾ സംഘടിപ്പിച്ചു കൊണ്ട് സംയോജിതമായ ഇടപെടൽ നടത്തണമെന്നും പുരസ്ക്കാരം ഏറ്റുവാങ്ങി കൊണ്ട് സർക്കിൾ ഇൻസ്പെക്ടർ നോബിൾ മാനുവൽ അഭിപ്രായപ്പെട്ടു .
പോത്താനിക്കാട് പോലീസ് സ്റ്റേഷനിൽ വച്ച് കോവിഡ് മാനദണ്ഡങ്ങൾ പാലിച്ചുകൊണ്ട് സംഘടിപ്പിച്ച ലളിതമായ ചടങ്ങിൽ ക്ലബ്ബ് പ്രസിഡന്റ് കെ.കെ അബ്ദുൽ റഹ്മാൻ , സെക്രട്ടറി അബ്ബാസ് കെ.എം , ചീഫ് കോ-ഓഡിനേറ്റർ ഷൗക്കത്തലി എം.പി ,ചാരിറ്റി ഹാൻഡ് ഓർഗനൈസർ ഷമീർ കെ.എം തുടങ്ങിയവർ ചേർന്ന് പുരസ്ക്കാരങ്ങൾ വിതരണം ചെയ്തു .
വൈസ് പ്രസിഡന്റ് സി.എം അഷ്റഫ് , മുൻ സെക്രട്ടറി യു.എച്ച് മുഹിയുദ്ധീൻ , മീഡിയാ കോ-ഓഡിനേറ്റർ റഫീഖ് കെ.പി , മുൻ രക്തദാന ഫോറം ഓർഗനൈസറും ദേശീയ ദുരന്ത നിവാരണ സേന അംഗവുമായ വിഷ്ണു പി.ആർ തുടങ്ങിയവർ സന്നിഹിതരായിരുന്നു . മോഷ്ടാക്കളെ പിടികൂടി നിയമത്തിന് മുന്നിൽ കൊണ്ടുവന്ന് നാട്ടുകാരുടെ ഭീതിയും ആശങ്കയും അകറ്റിയ സ്റ്റേഷനിലെ മുഴുവൻ പോലീസ് ഉദ്യോഗസ്ഥർക്കും ക്ലബ്ബിന്റെ നന്ദി അറിയിച്ചു .
