പെരുമ്പാവൂർ : നെടുമ്പാശ്ശേരി വിമാനത്താവളത്തിൽ ജോലി നോക്കുന്നതിനിടെ കോവിഡ് 19 ബാധിച്ച ജൂനിയർ ഹെൽത്ത് ഇൻസ്പെക്ടർക്ക് മാനസികമായ പിന്തുണ നൽകണമെന്ന് എൽദോസ് കുന്നപ്പിള്ളി എം.എൽ.എ അഭ്യർഥിച്ചു. ഇദ്ദേഹം ഇപ്പോൾ ഐസുലേഷനിലാണ്. ആരോഗ്യ പ്രശനങ്ങൾ ഒന്നും ഇപ്പോൾ നിലവില്ലെന്നാണ് അറിയുവാൻ സാധിച്ചതെന്ന് എം.എൽ.എ പറഞ്ഞു. സാമൂഹ്യ മാധ്യമങ്ങളിൽ കൂടി ഇദ്ദേഹത്തിന്റെ കുടുംബാംഗങ്ങളെ മോശമായി ചിത്രീകരിക്കുന്നത് വേദനയോടെ പങ്കുവെച്ചത് കൊണ്ടാണ് പ്രതികരിക്കുന്നതെന്ന് എൽദോസ് കുന്നപ്പിള്ളി പറഞ്ഞു.
സമൂഹത്തിനും സർക്കാരിനും വേണ്ടി ജോലി ചെയ്ത ഒരു ആരോഗ്യ പ്രവർത്തകനെയും അദ്ദേഹത്തിന്റെ കുടുംബത്തെയും അവഹേളിക്കുന്നത് തെറ്റായ പ്രവണതയാണ്. ഇദ്ദേഹത്തിന്റെ മൂത്ത മകൾക്ക് പരിശോധനനയിൽ നെഗറ്റിവ് എന്നാണ് റിപ്പോർട്ട് കിട്ടിയിരിക്കുന്നത്. അദ്ദേഹവുമായി ബന്ധപ്പെട്ട ആരോഗ്യ വകുപ്പിലെ മറ്റു ഉദ്യോഗസ്ഥരെ ക്വാറൈന്റയിനിൽ പ്രവേശിപ്പിച്ചിട്ടുണ്ട്. ഈ സമയത്ത് ഇവർക്ക് മാനസികമായ പിന്തുണ നൽകണമെന്നും എം.എൽ.എ അഭ്യർഥിച്ചു.
