കോതമംഗലം : കുട്ടമ്പുഴ പഞ്ചായത്തിലെ മണികണ്ഠൻ ചാൽ ഭാഗത്ത് 2018ലെ പ്രളയത്തിൽ തകർന്ന കലയത്തോലിൽ വീട്ടിൽ ഷാജിയുടെ വീട് സേവാഭാരതിയുടെ തലചായ്ക്കാനൊരിടം പദ്ധതിയുടെ ഭാഗമായി പുനർ നിർമിച്ചു നൽകി. ഭാര്യയും മൂന്ന് കുട്ടികളുമടങ്ങുന്ന നിർധന കുടുംബത്തെ കൂലിവേല ചെയ്താണ് ഷാജി നോക്കുന്നത്. കുട്ടികളുടെ വിദ്യാഭ്യാസവും കുടുംബ ചിലവും നടത്തുവാൻ ബുദ്ധിമുട്ടനുഭവിക്കുന്നതിനിടയിലാണ് 2018ലെ പ്രളയം ഷാജിയുടെ വീടുകൂടി കവർന്നെടുത്തത്. തുടർന്ന് താൽക്കാലിക ഷെഡിലേക്ക് താമസം മാറിയ കുടുംബത്തിന് പുതിയൊരു വീട് നിർമ്മിക്കുക എന്ന കാര്യം ചിന്തിക്കുവാൻ കൂടി സാധിക്കാത്ത അവസ്ഥയായിരുന്നു.
അതിനിടയിലാണ് ഈ നിർധന കുടുംബത്തിന്റെ ദുരവസ്ഥ ശ്രദ്ധയിൽപ്പെട്ട സേവാഭാരതി പ്രവർത്തകർ ഷാജിയുടെ കുടുംബത്തിന് വീടൊരുക്കുവാനായി രംഗത്തെത്തിയത്. 9മാസം കൊണ്ട് വീട്പണികൾ പൂർത്തീകരിക്കുകയും, റിപബ്ലിക് ദിനമായ ചൊവ്വാഴ്ച രാവിലെ 10 മണിക്ക് രാഷ്ട്രീയ സ്വയംസേവക സംഘം സംസ്ഥാന സേവാപ്രമുഖ് എം സി വത്സൻ പുതിയ വീടിൻറെ താക്കോൽ ദാനം നടത്തുകയും ചെയ്തു.
രാഷ്ട്രീയ സ്വയം സേവക സംഘം എറണാകുളം വിഭാഗ് കാര്യവാഹ് എൻ എസ് ബാബു ഗൃഹ പ്രവേശന ചടങ്ങിൽ ദീപപ്രോജ്വലനം നടത്തി. താലൂക് സംഘചാലക് ഇ എൻ നാരായണൻ അദ്ധ്യക്ഷത വഹിച്ച പരിപാടിയിൽ സേവാഭാരതി ജില്ലാ ജനറൽ സെക്രട്ടറി സി ബി രാമചന്ദ്രൻ, ഭവന നിർമ്മാണ സമിതി അദ്ധ്യക്ഷൻ പി ആർ ബിജു, സേവാഭാരതി ജില്ലാ സംഘടന സെക്രട്ടറി മണികണ്ഠൻ ,ജില്ലാ കാര്യവാഹ് പി ജി സജീവ്, ആർ സന്ദീപ്, സി എം ദിനൂപ്, പി ആർ മധു, എന്നിവർ ആശംസയർപ്പിച്ച് സംസാരിച്ചു.
സമൂഹത്തിൻ്റെ അശ്രയ കേന്ദ്രമാണ് സേവാഭാരതി: ശ്രീ MC വൽസൻ. പൊതു സമൂഹത്തിന് ഏത് മേഖലയിലാണോ ആവശ്യം വരുന്നത് ആ പ്രവർത്തനം ഏറ്റെടുത്ത് സാന്ത്വനം നൽകുന്ന സംഘടനയാണ് സേവാഭാരതി. 2018 ലെ പ്രളയത്തിൽ വീട് നഷ്ടപെട്ട കുട്ടമ്പുഴ മണികൺഠൻ ചാൽ ഷാജിയുടെ വീടിൻ്റെ താക്കോൽ ദാനം നിർവഹിച്ചുകൊണ്ട് അദ്ധേഹം പറഞ്ഞു. കേരളത്തിൽ സേവാഭാരതി വീടു നഷ്ടപ്പെട്ടവർക്ക് പുനർജനി പദ്ധതിയുടെ ഭാഗമായി 1000 വീടുകൾ നിർമിച്ചു നൽകി എന്നും അദ്ധേഹം പറഞ്ഞു. സർക്കാർ സംവിധാനത്തിനു പോലും കടന്ന് ചെല്ലാൻ സാധിക്കാത്ത കേരളത്തിലെ അട്ടപ്പാടി അടക്കമുള്ള വിവിധ പ്രദേശങ്ങളിലെ ജനങ്ങളുടെ വീടുകളുടെ നിർമ്മാണം നടത്താൻ സേവാഭാരതിക്ക് സാധിച്ചു. പ്രളയത്തിൽ സ്വന്തമായി ഉണ്ടായിരുന്ന വിടു നഷ്ടപ്പെട്ട സേവാഭാരതി പ്രവർത്തകൻ പോലും സ്വന്തം സ്ഥലത്ത് മറ്റൊരാൾക്ക് വീടു നിർമിക്കാൻ മുന്നിട്ടിറങ്ങുന്നു എന്നതാണ് സേവാഭാരതിയെ സമൂഹത്തിൻ്റെ സംഘടനയാക്കി മാറ്റിയത് എന്നും അദ്ദേഹം പറഞ്ഞു.
