പെരുമ്പാവൂർ : മണ്ഡലത്തിലെ കോവിഡ് – 19 പ്രതിരോധ പ്രവർത്തനങ്ങൾക്ക് പെരുമ്പാവൂർ താലൂക്ക് ആശുപത്രിയിലേക്ക് എൻ.സി.ഡി മാനേജ്‌മെന്റ് ഉപകരണങ്ങൾ വാങ്ങുന്നതിന് 5.50 ലക്ഷം രൂപയും വെങ്ങോല സാമൂഹ്യാരോഗ്യ കേന്ദ്രത്തിലേക്ക് പാലിയേറ്റിവ് സെക്കണ്ടറി യൂണിറ്റിന്റെ പ്രവർത്തനങ്ങൾക്കായി 5 ലക്ഷം രൂപയും ഉൾപ്പെടെ 10.50 ലക്ഷം രൂപ അനുവദിച്ചു. എൽദോസ് കുന്നപ്പിള്ളി എം.എൽ.എയുടെ ഈ വർഷത്തെ പ്രത്യേക വികസന ഫണ്ടിൽ നിന്നുമാണ് തുക അനുവദിച്ചത്.
ഹാൻഡ്ഹെൽഡ് നോൺ മൈഡ്രിയാറ്റിക്ക് മോഡൽ ബി ക്യാമറ, മൾട്ടി പാരാമീറ്റർ മോണിറ്റർ, മോഡൽ എ പൾസ് ഓക്സിമീറ്റർ, എൻ95 മാസ്‌ക്കുകൾ, 100 പി.പി.ഇ കിറ്റുകൾ എന്നിവയാണ് പെരുമ്പാവൂർ താലൂക്ക് ആശുപത്രിയിലേക്ക് അനുവദിച്ചിട്ടുള്ളത്. ആശുപത്രി അധികൃതർ ആവശ്യപ്പെട്ട മുഴുവൻ ഉപകരണങ്ങളും എം.എൽ.എ ഫണ്ടിൽ നിന്നും അനുവദിക്കുമെന്ന് എൽദോസ് കുന്നപ്പിള്ളി പറഞ്ഞു.
വെങ്ങോല സാമൂഹ്യാരോഗ്യ കേന്ദ്രത്തിലെ സാന്ത്വന പരിചരണ വിഭാഗത്തിന്റെ സെക്കൻഡറി യൂണിറ്റിന് വാഹനം അനുവദിക്കുന്നതിനാണ് 5 ലക്ഷം രൂപ അനുവദിച്ചത്. 237 രോഗികളാണ് ഇവിടെ സാന്ത്വന പരിചരണ വിഭാഗത്തിൽ രജിസ്റ്റർ ചെയ്തിട്ടുള്ളത്. ഇവർക്ക് ഫിസിയോ തെറാപ്പിയും വീടുകളിൽ എത്തി ശുശ്രുഷിക്കുന്നതിനും വാഹനം അനുവദിച്ചത് പ്രയോജനം ചെയ്യുമെന്ന് എം.എൽ.എ പറഞ്ഞു.
