പല്ലാരിമംഗലം : കോതമംഗലം ബ്ലോക്ക് പഞ്ചായത്ത് 2020 – 2021 വാർഷിക പദ്ധതിയിൽ എട്ട് ലക്ഷംരൂപ വകയിരുത്തി ബ്ലോക്ക് പരിധിയിലെ വിവിധ പഞ്ചായത്തുകളിലെ 400 സ്വാശ്രയ സംഘങ്ങൾക്ക് പച്ചക്കറി തൈകൾ വിതരണം ചെയ്യുന്നതിന്റെ ഭാഗമായി പല്ലാരിമംഗലം ഗ്രാമപഞ്ചായത്തിലെ പത്ത് കുടുംബശ്രീ യൂണിറ്റുകൾക്ക് ഒന്നാം ഘട്ടത്തിൽ പച്ചക്കറി തൈകൾ വിതരണം ചെയ്തു.
പല്ലാരിമംഗലം കൃഷിഭവനിൽ നടന്ന ചടങ്ങിൽ ഗ്രാമപഞ്ചായത്ത് പ്രസിഡന്റ് പി കെ മൊയ്തു പച്ചക്കറിതൈകളുടെ വിതരണോത്ഘാടനം നിർവ്വഹിച്ചു. ബ്ലോക്ക് പഞ്ചായത്ത് മെമ്പർ ഒ ഇ അബ്ബാസ് അദ്ധ്യക്ഷത വഹിച്ചു. പഞ്ചായത്ത് വൈസ് പ്രസിഡന്റ് നിസാമോൾ സിദ്ധീഖ്, കൃഷി ആഫീസർ ജാസ്മിൻ തോമസ്, സി ഡി എസ് ചെയർപേഴ്സൺ ഷാമില ഷാഫി എന്നിവർ പ്രസംഗിച്ചു.
