മരത്തിൽ നിന്ന് വീണ് അരക്ക് കീഴിലേക്ക് തളർന്ന യുവാവിന് വീടൊരുങ്ങുന്നു.

പെരുമ്പാവൂർ : മരത്തിൽ നിന്ന് വീണ് അരക്ക് കീഴിലേക്ക് തളർന്ന യുവാവിന് എൽദോസ് കുന്നപ്പിള്ളി എം.എൽ.എ യുടെ എന്റെ വീട് പെരുമ്പാവൂർ പദ്ധതിയിൽ വീടൊരുങ്ങുന്നു. ഓട്ടോറിക്ഷ തൊഴിലാളി ആയ വെങ്ങോല മേപ്രത്ത്പടിയിൽ മാവോലിൽ വീട്ടിൽ  അജിമോൻ ആണ് എം.ബി.എം ഗ്രൂപ്പ് ചീഫ് എക്സിക്യൂട്ടീവ് ഓഫിസർ ആയ മുടിക്കൽ സ്വദേശി ശ്രീ സെയ്ത് മുഹമ്മദ് നസീറിന്റെ സഹായത്തോടെ വീട് നിർമ്മിച്ചു നൽകുന്നത്.

കുറച്ചു നാളുകൾക്ക് മുൻപ് മാവിൽ നിന്ന് വീണ് അരക്ക് കീഴ്‌പ്പോട്ട് തളർന്ന് പോയി അജിമോൻ കിടപ്പിലായിരുന്നു. എങ്കിലും ജീവിക്കുവാൻ വേണ്ടി ഇപ്പോഴും ഓട്ടോറിക്ഷ ഒടിക്കുകയാണ്. വികലാംഗ കോർപ്പറേഷൻ വഴി വായ്‌പ എടുത്തു വാങ്ങിയ ഓട്ടോറിക്ഷ പ്രത്യേകം സജ്ജീകരിച്ചാണ് അജിമോൻ ഓടിക്കുന്നത്. മേപ്രത്തപടിയിൽ വാടകയ്ക്കാണ് അജിമോനും കുടുംബവും ഇപ്പോൾ താമസിക്കുന്നത്. വെങ്ങോല ഗ്രാമപഞ്ചായത്ത് സംഘടിപ്പിച്ച പാലിയേറ്റിവ് കെയർ സംഗമത്തിലാണ് അജിമോൻ അഡ്വ. എൽദോസ് കുന്നപ്പിള്ളി എം.എൽ.എയോട് തന്റെ അവസ്ഥയെ കുറിച്ചു സംസാരിക്കുന്നത്. എം.എൽ.എ മണ്ഡലത്തിൽ നടപ്പിലാക്കുന്ന ‘ എന്റെ വീട് പെരുമ്പാവൂർ ‘ പദ്ധതിയിൽ ഉൾപ്പെടുത്തി അജിമോന് വീട് നിർമ്മിച്ചു കൊടുക്കുന്നതിന് എം.ബി.എം ഗ്രൂപ്പ് ചീഫ് എക്സിക്യൂട്ടീവ് ഓഫിസർ ആയ മുടിക്കൽ സ്വദേശി ശ്രീ സെയ്ത് മുഹമ്മദ് നസീറിനോട് സംസാരിക്കുകയും അദ്ദേഹം സന്തോഷപൂർവ്വം ഈ കാര്യം സമ്മതിക്കുകയും ചെയ്തു.

വെങ്ങോല ഗ്രാമപഞ്ചായത്തിന് എതിർവശത്തുള്ള 3.5 സെന്റ് സ്ഥലത്ത് നിമ്മിക്കുന്ന വീടിന്റെ കല്ലിടൽ കർമ്മം എൽദോസ് കുന്നപ്പിള്ളി എം.എൽ.എ നിർവഹിച്ചു. ബ്ലോക്ക് പഞ്ചായത്ത് പ്രസിഡന്റ് നൂർജഹാൻ സക്കീർ,  വെങ്ങോല ഗ്രാമപഞ്ചായത്ത് പ്രസിഡന്റ് സ്വാതി റെജികുമാർ, ബ്ലോക്ക് പഞ്ചായത്ത് വൈസ് പ്രസിഡന്റ് ജോജി ജേക്കബ്ബ്, ഗ്രാമപഞ്ചായത്ത് വൈസ് പ്രസിഡന്റ് എൽദോ മോസസ്, പി.എ മുക്താർ, വി.എം ഹംസ, രാജു മാത്താറ, വി.എച്ച്. മുഹമ്മദ്, റെനീഷ അജാസ്, എം.ബി ജോയി എന്നിവർ സംബന്ധിച്ചു.