കൊച്ചി: സമൂഹത്തിന് പ്രചോദനമാകുന്ന പ്രവര്‍ത്തനങ്ങള്‍ കാഴ്ചവെക്കുന്ന വനിതകളെ ആദരിക്കുന്നതിനായി റെഡ് എഫ്എം ഏര്‍പ്പെടുത്തിയ ‘റെഡ് ശക്തി അവാര്‍ഡ് 2026’ കോട്ടപ്പടി സെന്റ് ജോണ്‍സ് സ്‌പെഷ്യല്‍ സ്‌കൂള്‍ പ്രിന്‍സിപ്പല്‍ സി. ശ്രുതി ജോസ് എംഎസ്‌ജെയ്ക്ക്. ഭിന്നശേഷിക്കാരായ വിദ്യാര്‍ത്ഥികളുടെ ഉന്നമനത്തിനായി നടത്തുന്ന മാതൃകാപരമായ പ്രവര്‍ത്തനങ്ങളും, തന്റെ കര്‍മ്മമേഖലയിലൂടെ മറ്റുള്ളവര്‍ക്ക് സ്വപ്നങ്ങള്‍ കാണാനും അവ നേടിയെടുക്കാനും നല്‍കുന്ന പ്രചോദനവുമാണ് സി. ശ്രുതി ജോസിനെ പുരസ്‌കാരത്തിന് അര്‍ഹയാക്കിയത്.
രണ്ട് പതിറ്റാണ്ടിലേറെയായി കോതമംഗലം കോട്ടപ്പടി കേന്ദ്രീകരിച്ച് ഭിന്നശേഷിക്കാരായ കുട്ടികളുടെയും യുവാക്കളുടെയും സമഗ്ര വളര്‍ച്ചയ്ക്കായി പ്രവര്‍ത്തിക്കുന്ന സ്ഥാപനമാണ് സന്റ് ജോണ്‍സ് സ്‌പെഷ്യല്‍ സ്‌കൂള്‍ ആന്റ് റീഹാബിലിറ്റേഷന്‍ സെന്റര്‍. 2004 മുതല്‍സേവനം അനുഷ്ഠിക്കുന്ന സ്ഥാപനത്തില്‍ നിലവില്‍ 85-ഓളം വിദ്യാര്‍ത്ഥികള്‍ പഠിക്കുന്നുണ്ട്. പ്രത്യേക വിദ്യാഭ്യാസം, വിവിധ തെറാപ്പികള്‍, തൊഴിലധിഷ്ഠിത പരിശീലനം എന്നിവയിലൂടെ വിദ്യാര്‍ത്ഥികളെ സ്വയംപര്യാപ്തതയിലേക്ക് കൈപിടിച്ചുയര്‍ത്തുന്നതില്‍ സി. ശ്രുതി ജോസിന്റെ നേതൃത്വത്തിലുള്ള 24-ലധികം വരുന്ന അധ്യാപക-അനധ്യാപക സംഘം നിര്‍ണ്ണായക പങ്കുവഹിക്കുന്നു. കൊച്ചി കാക്കനാട് കോറല്‍ റീഫ് ഹോട്ടലില്‍ നടന്ന ചടങ്ങിലാണ് പുരസ്‌കാരം സമ്മാനിച്ചത്
