കോതമംഗലം: സംസ്ഥാന ലോട്ടറിയുടെ ഘടനയ്ക്ക് എത്രയും വേഗം മാറ്റങ്ങള്‍ വരുത്തി ലോട്ടറി തൊഴിലാളികളെയും ഏജന്റുമാരെയും ലോട്ടറിയേയും സംരക്ഷിക്കാന്‍ ശക്തമായ നടപടി സര്‍ക്കാരിന്റെ ഭാഗത്ത് ഉണ്ടാകണമെന്ന് കേരള ലോട്ടറി ഏജന്റ്‌സ് ആന്റ് സെയ്‌ലേഴ്‌സ് അസോസിയേഷന്‍ ഐ.എന്‍.റ്റി.യു.സി. കോതമംഗലം താലൂക്ക് സമ്മേളനം ആവശ്യപ്പെട്ടു. വര്‍ഷത്തില്‍ 365 ദിവസവും തൊഴില്‍ ചെയ്യുന്ന മേഖലയാണ് ലോട്ടറി വില്പനമേഖല. മാസത്തില്‍ ഒരു ദിവസം ലോട്ടറി മേഖലയ്ക്ക് അവധി കൊടുക്കണം, ലോട്ടറി ഘടനയ്ക്ക് മാറ്റങ്ങള്‍ വരുത്തി, തൊഴിലാളികള്‍ക്കും ഏജന്റ്മാര്‍ക്കും കമ്മീഷന്‍ വര്‍ദ്ധിപ്പിക്കുകയും, ലോട്ടറിയുടെ സമ്മാനങ്ങള്‍ വര്‍ദ്ധിപ്പിക്കുകയും ചെയ്യണം.
കേരള ലോട്ടറി ക്ഷേമനിധി ബോര്‍ഡില്‍ നിന്ന് തൊഴിലാളികള്‍ക്ക് കൊടുത്ത് കൊണ്ടിരിക്കുന്ന ആനുകൂല്യങ്ങളായ വിദ്യാഭ്യാസ , വിവാഹ, മരണാനന്തര ആനുകൂല്യങ്ങളും പ്രസവ ആനുകൂല്യങ്ങളും വര്‍ദ്ധിപ്പിക്കാന്‍ നടപടി എടുക്കണമെന്നും യോഗം സര്‍ക്കാരിനോട് ആവശ്യപ്പെട്ടു. ജില്ലാ പ്രസിഡന്റ് ജെയിംസ് അധികാരി ഉദ്ഘാടനം ചെയ്തു.
യൂണിയന്‍ താലൂക്ക് പ്രസിഡന്റ് സുരേഷ് ആലപ്പാട്ട് അധ്യക്ഷത വഹിച്ചു. താലൂക്ക് വൈസ് പ്രസിഡന്റ് അനില്‍ രാമന്‍നായര്‍ , എം.ആര്‍. ബിനീഷ്, ജോസ് പുന്നയ്ക്കല്‍, തങ്കമ്മ കൃഷ്ണന്‍, ലാലു വര്‍ഗീസ് എന്നിവര്‍ പ്രസംഗിച്ചു.
