കോതമംഗലം: എംഎൽഎ ഷിബു തെക്കുംപുറത്തിന്റെ നേതൃത്വത്തിൽ തദ്ദേശ സ്വയംഭരണ സ്ഥാപനങ്ങളുടെയും വിവിധ സംഘടനകളുടെയും സഹകരണത്തോടെ സംഘടിപ്പിക്കുന്ന പൊളിഓണം 2026 ഓണാഘോഷങ്ങൾക്ക് ഇന്ന് തുടക്കമാകും. ഒരാഴ്ച നീളുന്ന ആഘോഷപരിപാടികളിൽ കലാ-സാംസ്കാരിക പരിപാടികൾ, വിവിധ മത്സരങ്ങൾ, വിനോദ പരിപാടികൾ എന്നിവ അരങ്ങേറും.
ഓണാഘോഷങ്ങളുടെ ഭാഗമായി ഇന്ന് രാവിലെ 11ന് കോതമംഗലം കെഎസ്ആർടിസി ബസ് സ്റ്റാൻഡ് പരിസരത്ത് മെഗാപൂക്കളം ഒരുക്കും. വിവിധ മേഖലകളിൽ നിന്നുള്ളവരുടെ പങ്കാളിത്തത്തോടെയാണ് പൂക്കളം ഒരുക്കുന്നത്. ഉച്ചയ്ക്ക് രണ്ടിന് കോതമംഗലം നഗരസഭാ പരിസരത്തുനിന്ന് സാംസ്കാരിക ഘോഷയാത്ര ആരംഭിക്കും.
മുത്തുക്കുടകളേന്തി അയ്യായിരത്തോളം പേർ ഘോഷയാത്രയിൽ അണിനിരക്കും. പഞ്ചവാദ്യം, കാവടി, ശിങ്കാരിമേളം, ബാന്റ്സെറ്റ്, കൈകൊട്ടിക്കളി തുടങ്ങിയ കലാരൂപങ്ങളുടെ അകമ്പടിയോടെ നടക്കുന്ന ഘോഷയാത്ര നഗരവീഥികളെ ഉത്സവാന്തരീക്ഷത്തിലാക്കും. ഘോഷയാത്ര കെഎസ്ആർടിസി ബസ് സ്റ്റാൻഡ് പരിസരത്ത് സമാപിക്കും.
തുടർന്ന് വൈകിട്ട് നാലിന് കെഎസ്ആർടിസി ബസ് സ്റ്റാൻഡ് പരിസരത്ത് നടക്കുന്ന പൊളിഓണം 2026 ന്റെ ഔദ്യോഗിക ഉദ്ഘാടനം ഫിഷറീസ് വകുപ്പ് മന്ത്രി അഡ്വ. വി.ഇ. അബ്ദുൾ ഗഫൂർ നിർവഹിക്കും. ഡീൻ കുര്യാക്കോസ് എംപി, സിനിമാതാരം മിയ ജോർജ് എന്നിവർ മുഖ്യാതിഥികളാകും.
വൈകുന്നേരം ഏഴിന് ഭൂതത്താൻകെട്ടിൽ ഒരുക്കിയിട്ടുള്ള ലൈറ്റ് ഇലൂമിനേഷനു സ്വിച്ച് ഓൺ നടക്കും. ഭൂതത്താൻകെട്ടിനെ കൂടുതൽ മനോഹരമാക്കുന്ന ദീപാലങ്കാരങ്ങളുടെ പ്രകാശനം ഓണാഘോഷങ്ങൾക്ക് കൂടുതൽ തിളക്കമേകും.
കോതമംഗലം നിയോജകമണ്ഡലത്തിലെ വിവിധ തദ്ദേശ സ്വയംഭരണ സ്ഥാപനങ്ങളെയും സംഘടനകളെയും ജനങ്ങളെയും ഒരുമിപ്പിച്ചാണ് പൊളിഓണം 2026 സംഘടിപ്പിക്കുന്നത്. കുട്ടികൾ മുതൽ മുതിർന്നവർ വരെയുള്ളവർക്ക് ഒരുപോലെ ആസ്വദിക്കാവുന്ന പരിപാടികളാണ് ആഘോഷത്തിന്റെ ഭാഗമായി ഒരുക്കിയിരിക്കുന്നത്. നാടിന്റെ തനത് കലാരൂപങ്ങൾക്കും സാംസ്കാരിക പാരമ്പര്യങ്ങൾക്കും പ്രാധാന്യം നൽകുന്നതിനൊപ്പം യുവാക്കൾക്കും കുടുംബങ്ങൾക്കും ആവേശം പകരുന്ന വിനോദ പരിപാടികളും ആഘോഷത്തിന്റെ ഭാഗമാകും.
ഓണത്തിന്റെ ആഘോഷത്തിമിർപ്പിൽ കോതമംഗലത്തെ ഒരുമിപ്പിക്കാനും നാടിന്റെ കൂട്ടായ്മയും സൗഹൃദവും ആഘോഷമാക്കാനുമാണ് പൊളിഓണം 2026 ലക്ഷ്യമിടുന്നത്. നാളെ
(ഞായറാഴ്ച) രാവിലെ 10ന് ഭൂതത്താൻകെട്ടിൽ ജെൻസി റേസ് എന്ന പേരിൽ മഡ് റേസും സംഘടിപ്പിച്ചിട്ടുണ്ട്. വിവിധ വിഭാഗങ്ങളിലായി നൂറോളം വാഹനങ്ങൾ മത്സരത്തിൽ പങ്കെടുക്കും. ഓഫ് റോഡ് പ്രേമികൾക്കും കാണികൾക്കും ആവേശം പകരുന്ന തരത്തിലാണ് മത്സരം ഒരുക്കിയിരിക്കുന്നത്.
